Udako igandeetan ere kale garbiketa zerbitzua izango du Pasaiak
Etzitik irailaren 29ra bitarte aparteko zerbitzu bat eskainiko dute kale garbitzaileek igande guztietan. Erabaki honekin "bizilagunen eskaera historikoetariko bati erantzungo" diotela dio udal gobernuak.
Pasaiako Udalak jakinarazi berri duenez, igandetik (hilak 7) datorren irailaren 29ra bitarte (igandea da), igande guztietan ere kale garbiketako zerbitzua izango da lau barrutietan. Erabaki honekin “bizilagunen eskaera historikoetariko bati erantzungo” diotela diote udaleko iturriek: “Jakina da Pasaiak bisitari ugari jasotzen dituela urte osoan zehar, batez ere udan. Hori dela eta, bai Donibanen, bai San Pedroko behealdean jende asko biltzen denez, paperontziak eta udalerriko hondakin irlak gehiegi betetzen dira”.
Horri aurre egiteko, igandetan ere udalak aparteko zerbitzu bat izango du, lau barrutietako ardatz nagusietako paperontziak husteko eta edukiontzi gune beteenak txukuntzeko.
Iraitz Pazos Zerbitzu, Sare eta Mantentze lanetako zinegotziak esan du udal gobernuaren agintaldi planean “markatutako mugarrietako” bat dela: “Udalarentzat garrantzitsua da gure herria ahalik eta garbien egotea, eta neurri honek erantzuna eman nahi dio bereziki udako igandeetan sortzen zen gabeziari. Pasaia garbi mantentzea guztion erantzukizuna da, bai hemen bizi garenona, bai bisitatzen gaituztenena”, esan du Pazosek.
Irailean zerbitzuaren balorazioa egingo dutela erantsi du zinegotziak, “urte osoan zehar luzatu behar ote den erabakitzeko”.
