Oiartzun-Gasteiz, Euskal Herriko Herriarteko Txapelketan
Gipuzkoako eta Arabako txapeldunek datorren igandean finalerdia jokatuko dute, Zumarragan. Beste finalerdia, Larraun-Markina.
Pilotari oiartzuarrak, txapela jantzita, Gipuzkoako finalaren ondoren. Oiartzunek Gipuzkoako esku huskako Herriarteko Txapelketa irabazi zuen ekaineko azkeneko larunbatean, Zaldibiaren kontra. Izerdi ugari eta bihotz-taupada asko kostatu zuen garaipena izan zen, baina txapela janztea lortu zuten.
Herrialdeko txapelketa irabazteak beste sari bat dakar berarekin: Euskal Herriko Herriarteko Txapelketan parte hartzea. Iaz ezin izan zuten garaipena lortu, baina bai duela bi urte. Lortu duten txapelketa bakarra izan da.
Hego Euskal Herriko lau txapeldunek parte hartuko duten txapelketako finalerdiak asteburu honetan jokatuko dituzte. Horrela, datorren igandean —hilak 14— Gasteizen kontra arituko dira, Zumarragako Beloki pilotalekuan. 11:00etan hasiko dira kadeteen arteko partidak, jubenilekin jarraitu eta seniorrekin bukatzeko.
Finala hilaren 21ean jokatuko dute. Beste finalerdia Larraunek eta Markina-Xemeinek jokatuko dute, larunbatean.
Bi finalerdiak zuzenean jarraitu ahal izango dira, Euskadiko Euskal Pilota Federazioaren Facebook orrialdetik.
