Atera dute labetik madalenetako jai egitaraua
Bihar 10:00etan hasiko dira banatzen jai egitaraua eta poltsikorako bertsioa udaletxeko arkupetan. Udal eraikinetan ere eskura izango dira programak.
Altxorra eskutan bildu dira gaur Herriko Plazara Aizpea Otaegi alkatea, Maite Gartzia Kultura zinegotzia, eta Bernar Lemos (EH Bildu) Isaac Palencia (PSE-EE), Elixabete Murua (EAJ) eta Antonio Vicente (PP) zinegotziak. Labetik atera berri dute madalenetako jai egitaraua eta gaur aurkeztu dute korporazioko kideek. Herritarrek ordu batzuk itxaron beharko dituzte oraindik ere, ale bat jasotzeko, izan ere, bihar hasiko baitira banatzen jai egitaraua zein poltsikorako bertsioa udaletxeko arkupetan 10:00etatik 13:00etara. Udaletxean, Aldakoenean, Lekuona Fabrikan, galtzarabordan, fanderia eta Beraungo kirol instalazioetan eta gainontzeko udal eraikinetan eskuratzeko aukera ere izango da, esan moduan bihartik aurrera.
Aizpea Otaegi alkateak hartu du hitza, festak “garena ospatzeko” aukera direla esateko eta hori “errespetuz eta gure aniztasuna ospatuz” egiteko deia zabaldu du. Ardura hartzera deitu du, gainera, Errenteria-Oreretako jaiak “eredugarriak” izan daitezen, “bizikidetzari eta elkarrekiko errespetuari dagokionez”.
Aipamena udal agintariak jai batzordeari, horretan parte hartzen duten eragile, elkarte eta herritarrek egiten duten lan eskergari esker delako Otaegiren hitzetan posible jaiak ospatzea: “Jai parte hartzaileak dira gureak, urteak daramatzagu jai batzordearekin elkarlanean jaiak antolatzeko, baina etengabe ari gara elkarlan horretan sakontzen. Aurten, bereziki, aipatu nahiko nuke alde batetik gazteen programazioa gazteekin beraiekin antolatzeko sare sozialen bidez iniziatiba abiatu dela eta gazte askok parte hartu dutela. Horrek ahalbidetzen digu adin guztientzako erakargarria izango den programazioa osatzea eta zentzu horretan ere gazteei eskerrak eman nahi dizkiet egin dituzten ekarpenengatik”.
Bestaldetik, aipamen berezia ere aurten lehenengoz jaietako omendua aukeratu duen herritarrez osatutako batzordeari, “pausu garrantzitsua da partaidetzan eta herritarren inplikazioan sakontzeko. Prozesua bera oso polita izan da eta positiboki baloratu da”. Herritar horiei ere eskerrak eman dizkie alkateak hatutako arduragatik, “ez baita nolanahiko erabakia madalenetako omendua aukeratzea”.
Konpromisoa eta inplikazio hitzak gaurko agerraldian erdi-erdian jarri ditu Otaegik, “halakoa da gure herria, eta herriarekiko atxikimendu handia duten herritarrak dauzkagu. Horren erakusgarri dira jaiak eta esango nuke horren erakusgarri edo adibide badirela DYAko kideak ere”. Aurtengo menduek egiten duten lan konprometitu eta handiari aitortza egin dio alkateak, “oso bat datoz gure herriarekin eurek transmititzen dituzten balioak”.
Ondo pasatzeko deia herritarrei, eta jaietan ere “herri eredugarri” izateko eskaera.
Hiru txupinazo
Maite Gartzia Kultura batzordeak hartu du hitza ondoren. Berak ere eskerrak eman dizkie jai batzordea osatzen duten norbanako, eragile eta elkarteei. Jaiak piztuko dituen txupinazoari begira jarri da gero, gogora ekartzeko ohi bezala, hilaren 21eko 19:00etan piztuko dutela suziria. “Herriko Plaza adin guztietako topagune izatea nahi dugu”, erantsi du Gartziak, eta oroitu ez dela txupinazo bakarra izango, Mila koloretako txupinazo txikia, eta Holi txupinazoa ere izango dira aurten ohiturari jarraituz. Halaber, txupinazo nagusia, jarraitu bai baina lasaitasunetik egin nahi dutenentzat, Zumardian pantaila erraldoia jarriko dutela esan du, eta streaming bidez jarraitzeko aukera ere izango dela Herri Bizia Webgunearen bidez. Egin klik hemen.
Jai egitaraua zein poltsikorako bertsioa bihartik eskuratu ahalko dela ere jarri du nabarmen: “9.400 ale argitaratu dira paperean, eta beste hainbeste poltsikorako formatuan”. Digitalean ere kontsultatu ahalko da, egin klik hemen.
Azkenik, jaiak nola bizi dituzten partekatzeko gonbita egin diete herritarrei, sare sozialetan #Madalenak2024 traola erabilita, “kontakizun kolektiboa egiteko”.