Oiartzun ibaia eta Pasaiako Portua Errenteria Hiria Ikurrinaren agertoki igandean
KAE2 Ligako bosgarren estropada izango da igandekoa eta zazpi tripulaziok hartuko dute parte.
Errenteria Hiria Ikurrinaren 11. ekitaldia jokatuko dute igandean Oiartzun ibaia eta Pasaiako Portu artean. Hibaika Arraun Elkarteak antolatutako estropada da eta Errenteriako Udalaren Kirol sailaren laguntza du.
11:00etan hasiko da estropada eta KAE2 Ligan ari diren zazpi ontziak ariko dira ikurrina eskuratzeko lehian: Hibaika, Astillero, Donostiarra, Castreña, Busturialdea, Lutxana eta Santoña. Banakako erlojupekoa izango da estropada, bi luze eta ziaboga bakarrekoa eta arraunlariek 3 itsas miliako distantzia egin beharko dute (5.556 metro). Iztieta pasealekuan hasi eta bukatuko da estropada, Iztieta-Ondartxoko Gurekin Auzo Elkartearen egoitza parean; ziaboga berriz, Trintxerpe hasieran egingo dute traineruek.
Igandekoa aukera paregabea izango da traineruak gertu-gertutik ikusteko lehian.
Hibaikako gizonen traineruak aldekoa izango du lehen eskutik ezagutzen duelako estropada eremua, eta ziur, joan den larunbatean David Iglesiasek zuzentzen duen arraunlari taldeak Donostian erakutsi zuen “beste bertsio” hori berriro ikusteko aukera izango dutela bertaratzen direnek.
Hibaika Arraun elkarteak zein Errenteriako Udalak bertaratu eta arraunarekin gozatzeko deia egin diete herritarrei. Errenteria-Oreretako arraun klubak, gainera, Madalen ontziko koloreekin bertaratzera deitu ditu Hibaikazaleak eta herrikideen eskifaia animatzera.
Denboraldirako erronkak
David Iglesiasek play offa du begiz jota eta estropada guztietara helburu horrekin ateratzen ari dira. Aldaketak izan ditu denboraldi honetan taldeak eta arraunlari oso gazteekin osatu du Hibaikak gizonen traineru hori. Une honetan bosgarren postuan da sailkapen orokorrean Errenteria-Oreretako trainerua, eta taula horretan gora egitea du erronka. Igandekoa, zalantzarik gabe, aukera paregabea izango dute Madalen ontzikoek puntuak bildu eta gorako bide horretan aurrera egiteko.
Igandeko estropadaren irteera hurrenkera sailkapenaren arabera egingo dute, atzekoz aurrera; hau da, sailkapen taulan azkena den taldea izango da erlojupekoa egiten lehena. Hori horrela, honela aterako dira: Santoña, Lutxana, Hibaika, Busturialdea, Castreña, Donostiarra eta Astillero. Ordubeteko iraupena izango du estropadak.
KAE 2 Ligako sailkapenak eta estropada egutegia kontsultatzeko egin klik hemen.