Arditurri Eguna ospatzeko, denetik
Goiz osoko egitarau oparoa prestatu dute aurtengo egun handirako. Ekitaldi eta ekintza guztiak doakoak izango dira.
Igande honetan (hilak 14) zer ikusi, ikasi eta gozatu izango da Oiartzungo Arditurriko meategian. Garai batean ilunpean lan egiten zuten meatzariek bizitzen zutena sentitzeko aukera izango dute oraindik esperientzia hori bizi ez dutenek zein errepikatu nahi dutenek. Arditurri Eguna ospatuko dute parketxean, goiz osoan zehar.
Egitarau oparoa antolatu dute iganderako, eta ekitaldi guztiak doakoak izango direla gogorarazi dute. Jatekoa eta edatekoa ere izango da, baita zuzeneko musika ere. Jende asko bertaratzea espero dute, eta “herritar guztiek parte hartzeko aukera bera izan dezaten”, aldez aurretik sarrerak eskuratu beharrean, egunean bertan hartuko beharko dira.
“Arditurrira gerturatzen diren bisitariak, izan helduak izan adin txikikoak, ez dira aspertuko, hortaz. Indarberritzeko, esan moduan, jan edari zerbitzua izango da eta, guztia are gehiago girotzeko musika emanaldia izango da Herri Arte eskolaren eskutik. Iradokizun bat: ez da aukera txarra egun horretan, bide berdean barrena, Arditurriraino bizikletan edo oinez joatea. Bizikletak uzteko leku egokitua izango da”, diote Arditurriko iturriek.
Informazio gehiago jaso nahi duteek helbide honetara idatzi edo 943 49 59 69 edo 688 89 50 68 telefono zenbakietara hots egin dezakete.
Beheko koadroan igandeko egitarau osoa kontsulta daiteke.
- 10:30 – 14:00. Meategietara bisita gidatuak.
- 11:00 – 13:00. Fosilen tailerra Luberriren eskutik.
- 11:00-14:00. Haurrentzat jolasak eta tailerrak Abaraxka ludotekaren eskutik.
- 11:00, 11:45, 12:30. Arditurri-3 erromatar garaiko meatze-galeriara bisita gidatua.
- 11:30. Alaia Gaztelumendiri eta Arditurriko mosaiko erraldoia egiten lagundu dutenei eskertza.
- 12:00. ‘Mineralen bila’ irteera gidatua parketxetik abiatuta.
