Karmengo Jaietan autobus zerbitzua bermatuko diete sanpedrotarrei
Udalaren, portuaren eta aldundiaren lankidetzari esker, behin-behineko mugikortasun plana adostu dute datozen egunetarako.
![](https://oarsoaldea.hitza.eus/site/files/2024/06/esnabide-kaleko-autobus-geltokia.png)
Joan den astelehenean (hilak 8) udalak aurreratu bezala, udalaren, portuaren eta aldundiaren lankidetzari esker, Trintxerpeko jaietan autobus publikoko zerbitzua bermatuko diete sanpedrotarrei eta festetara datozen bisitariei. Hiru aldeek karmenetarako behin-behineko mugikortasun plana adostu dute egun hauetan, udaleko iturrien arabera, “autobusak sanpedrotarrei eta goiko auzoetako bizilagun zaurgarrienei zerbitzua ematen jarrai dezan”.
Hala, jaiek iraun bitartean San Pedrora doan Euskadi etorbidea ibilgailuentzako itxita izango denez, autobus publikoak San Pedrora iriste aukera izaten jarraituko du, portuko eremutik. Asteartean proba bat egin zuten zerbitzuaren funtzionamendua egiaztatzeko, eta Iraitz Pazos alkateordearen arabera, “ongi” atera zen proba hori, baian halere, prebentziorako moldaketa bat egitea adostu zuten hiru aldeek. “Proba egiteko unean ez zegoen ez trafikorik ez gaizki aparkatutako ibilgailurik, eta autobusa nahiko justu sartu zen eremutik. Horregatik, bai gidariak eta baota bertan zeuden agintariek ere, erabaki zuten balizko blokeo bat ekiditeko ibilbide hori 10 metroko autobus txiki batekin egingo dela egunotan”, azaldu du Pazosek.
Hortaz, E08 linearen zerbitzua ohiko moduan mantenduko da, hau da, kai eremutik sartuko da orduero eta goiko auzoetatik egingo du itzulia. Autobus txiki horrek Azkuenetik Ainguraren biribilgunera doanean lanzadera zerbitzua emango du, Ciriza atzealdeko eremura hurbilduz herritarrak. “Alegia, San Pedrotik datorren norbaitek gero ospitaleko autobusa hartu nahi badu, aukera izango du Cirizan jaitsi eta autobus adlaketa doan egiteko orduero”, erantsi du alkateordeak.
Hori bai, larunbateko (hilak 13) 14:00etatik aurrera eta igandean ez da zerbitzu hori izango, ordutegi horretan autobusak ezingo baitu portu eremutik igaro, kaia zainduko duen langilerik ez dagoelako, eta bera arduratzen delako portuko hesiez.
Aldaketak
Gainerako lineetan ere aldaketak izango dira. E07 eta E09 lineen ibilbidea honakoa izango da: Carbonesetik igaro, buelta eman eta Cirizako orubean bukatuko du bidea. D38 lineak bere ohiko geltokiak mantenduko ditu, baina ibilbidea moldatuko du: San Pedro hiribidetik sartuko da Trintxerpera, Jaizkibel kaletik igoko, Ulia etorbidea zeharkatu eta Azkuenetik jaitsiko da berriro Donostiarantz joateko.
Teo Alberro alkateak honakoa esan du: “Ezarritako irizpidea izan da lanegunetan eta ohiko ordutegian autobus zerbitzu minimoa mantentzea, gehien bat jende zaurgarriena arretarik gabe ez uzteko. Horregatik ahalegindu gara goiko auzoetako ibilbide mantentzea, hor bizi den jendeak duelako mugikortasun arazo handiena herri erdigunera iristeko”. Bide batez, eskerrak eman dizkie aldundiari eta Portu Agintaritzari: “Elkarlana eta euren laguntza ezinbestekoak izan dira bermatzeko Karmengo Jaietan zehar sanpedrotarrek garraio zerbitzu publikoa izaten jarraituko dutela, eta egunotan ere mugikortasun jasangarriaren aldeko apustua egiten jarraituko dugula Pasaian”.