Madalenetan euskara indarrean eta barraketan prezio "herrikoiak"
Fanderiako feria eremuko baldintzak dira euskara sustatzea, prezio "herrikoiak" jartzea eta zarata gabeko uneak ezartzea, besteak beste.
Aurtengoan ere hitzarmena sinatu dute Errenteriako Udalak eta Euskadiko Ferialari Autonomoek Fanderiako feria eremuko baldintzak adosteko bai eta barrakei prezio “herrikoiagoak” jartzeko ere. Hain zuzen, honakoa izan prezioen baitan hartu duten erabakia: haurren bidaiak 2,20 euroko prezioa izango dute; helduenek, berriz, 2,80 eurokoa. Gainera, uztailaren 24an 11:00etatik 14:00etara eta 17:00etatik 19:00etara zein uztailaren 26an egun osoan zehar barraketako bidai guztiek 1,30 euro balioko dute.
Ez da hori izan, ordea, hartu duten erabaki bakarra, gune inklusiboa ere ezarri baitute oraingoan: “Barraka gunea ahalik eta esparrurik inklusiboena izan dadin, aurten, beste behin, ordutegi bat ezarri da zaratarik gabeko tarteak izan daitezen autismoa zein entzumen hipersentikortasuna dutenek ere barraketan gozatu dezaten”, diote sinatzaileek. Zehazki, zaratarik gabeko tartea uztailaren 23an, 24an eta 26an izango da, 17:00etatik 19:00etara.
Euskara bultzatzeko, hiztegitxoak
Horretaz guztiaz gain, ferialarien eta salmenta ibiltaria egiten dutenen lau urtetik gorako seme-alabentzako ludoteka zerbitzua eskainiko du udalak uztailaren 22tik 25era, 17:00 eta 20:00 artean. Haur horiek, gainera, dutxa zerbitzua ere eskuragarri izango dute Galtzarabordako kiroldegian uztailaren 20tik 25era 8:00 eta 12:00 artean. Hilaren 22an, ordea, Niessen Kulturgunean izango dute dutxatzeko aukera.
Oinarrizko zerbitzu horiek eskaintzeaz gain, badute beste helburu jakin bat: euskararen erabilera sustatzea, eta, horretarako, ferialariei eta salmenta ibiltaria egiten duten pertsonei hiztegitxoak banatuko zaizkie. Harremanetarako euskarazko oinarrizko hitzak ezagutaraztea da hain justu ekimen honen helburua.
