Mintzalagun egitasmoak 26 partaide berri izan ditu aurtengoan
Bigarren urtez egin dute Mintzalagun egitasmoa Pasaiako lau barrutietan. Datorren ikasturtean ere egitasmoa sustatzen jarraituko dute.
Mintzalagunak Artikutzara egin zuten bisita gidatuan. Bigarrenez sustatu dute elkarlanean Pasaiako Udalak, Udal Euskaltegiak eta Txirrita AEK Euskaltegiak Mintzalagun egitasmoa Pasaiako lau barrutietan, eta lorpenen artean Antxon sortu den ‘Gurasolagun’ talde irekia azpimarratu dute. Ostegunero Axular Plazan biltzen ziren, eta gurasoek seme alaben aurrean helduen artean euskarari eustea badagoela erakustea izan da helburua.
Boluntarioak aritzen dira horretan jardunean, eta aurtengoan hemeretzi talde eta 80 lagun aritu dira urritik ekainaren amaiera arte astero biltzen. 80 horietatik 59 bidelariak izan dira; euskara hobetu nahi izan dutenak, alegia, eta beste 21ak, aldiz, bidelagunak, euskaldun zaharrak eta ikasitako “euskaldun osoak”. Partaideen profila ere aztertu dute, eta emaitzek diotenez %62 emakumeak izan dira, eta batez besteko adina 54 urtekoa izan da. Gainera, 26 partaide berriak izan dira.
Bestalde, egitasmoa lau barrutietara iritsi izana garrantzitsua izan dela diote antolatzaileek, “izan ere, barruti bakoitzean kideen profila aldatzen bada ere, parte hartzaileei egindako asebetetze inkestan jasotakoaren arabera, leku guztietan ikusten dute ekimen honen beharra”. Era berean, gehitu dute mintzalagunek “oso ondo” baloratu dutela egitasmoa, bereziki “euskaraz praktikatzeko eta lagun berriak egiteko ematen duen aukerarengatik”.
Laura Ré Euskara zinegotzia pozik agertu da: “Egitasmoaren xedeetako bat euskararen erabilera handitzeko ekarpen bat egitea da, eta gure ustez Mintzalagun egitasmoak bete-betean asmatu du ahalegin horretan”. Hala ere, lanean jarraitu beharra dagoela azpimarratu du zinegotziak: “Egitasmo honi esker euskara gehiago erabili den arren, oraindik erabilera handitzeko tartea dagoela uste dute partaideek”.
Kanpo ekintzak ere bai
Asteroko hitzordua, ordea, ez da izan ikasturtean zehar egin duten jarduera bakarra, hainbat kanpo ekintza ere antolatu baitituzte hilabeteotan: Euskal sukaldaritza tailerrak, ‘Txikiren’ bakarrizketa, Mater itsas museoarekin irteera didaktikoa, ‘Gurasolagun’entzako gozogintza tailerra, Artikutzara bisita gidatua… Patxi Azparren, Pasaiako Mintzalagun egitasmoko dinamizatzailea: “Ekintza osagarriak oso garrantzitsuak izan dira egitasmoa erakargarriagoa izateko, eta, batik bat, taldeetan sakabanatuta aritu diren partaideen arteko sarea osatzeko”.
Ondorioz, datorren ikasturtean ere egitasmo hori sustatzen jarraituko dute “Pasaian euskaraz bizitzea gero eta errazagoa izan dadin”.
