Oiartzun Irratiaren lehen mende laurdena ospatu dute
Desafioa, musika eta bazkari jendetsua izan dira lehenengo osagaiak. Tio Teronen Semeek jarriko diote ginga.
Pasa den igandean bete ziren 25 urte Oiartzun Irratiak lehen emisioa egin zuenetik. Urte asko pasatu dira ordutik, baina Oiartzun Irratiak jarraitzen du hasierako helburua betetzen: euskarari —eta oiartzuerari— hauspoa ematea.
Goiza aurpegia margotzen hasi dute, herriko beste eragileekin elkarlanean antolatutako ekintzan. Ondoren, desafioaren txanda izan da, eta gazteak izan dira nagusi (argazki galeria eta zozketaren irabazlea, asteartean).
Herri bazkaria antolatu du Oiartzun Irratiak, lehen mende laurdena komunitatean ospatzeko. Entzule finenak ez dira falta izan, eta marmitako goxoarekin gozatu ahal izan dute kontzejupea bete duten guztiek.
Bazkaldu ondoren, Joxe Leon Kazabon eta Irati Odriozolak girotu dute, abestiekin. Bafle batek ia lurra musukatu du, baina ez da arazorik izan festarekin jarraitzeko. Abestu ondoren, kopla txapelketaren finalaren txanda izan da, eta txalometroak Julen Benitori eman diote saria.
Bingoak, Mxk3r eta Dantzall Sounden musika emanaldiak eta Tio Teronen Semeen emanaldiak biribilduko dute festa eguna.
