Aldaketak egongo dira Trintxerpeko trafikoan eta aparkalekuan
Uztailaren 17 eta 23 artean Adinberrin obrak egingo dituzte, eta udalak adierazi duenez lanek Trintxerpeko trafikoan eragina izango dute.
Trintxerpeko Alkateordetzaren atzealdean eta Euskadi etorbidearen artean lurperatuta dauden Iberdrolaren linea zaharrak kendu behar dituzte uztailaren 17 eta 23 artean; ondorioz, Adinberriko obrek eragina izango dute trafikoan eta aparkalekuan.
Hilaren 17an ekingo die lanei Euskadi etorbidean; zehazki, Santander bankuaren parean hasiko dira esku hartzeak. Lanak gauzatzeko galtzadako errei bat itxiko dute asteazken goizean, eta zirkulazioa bi noranzkoetan bideratuko da by-pass baten bidez.
Aldiz, hilaren 23an transformazio zentroa elikatzen duen Iberdrolaren linea desmuntatuko da; egun horietan, beraz, kableak azokaren atzeko aldean dagoen zutoinetik erdiraino jaitsiko dira. Azken lan horiei dagokienez, Cirizaren atzealdean dagoen aparkalekuaren zati bat hartuko dute. Lan horiek, ordea, egunean bertan amaituko dituzte.
