Oiartzun ez da Euskal Herriko Herriartekoaren finalean izango
Gasteizen kontra jokatu zuten finalerdiak. Galtzen hasi, berdindu eta azkenean ezin izan zuten txartelik lortu.
Gipuzkoako Herriartekoaren finaleko irudia, ekainaren 30ekoa. Oiartzungo esku huskako pilotariek ez dute Euskal Herriko Herriarteko Txapelketako finala jokatuko. Atzo (igandea, hilak 14) jokatu zituzten finalerdietako hiru partidak, Gasteizen kontra. Zumarragako Beloki pilotalekuan izan ziren norgehiagokak.
Ohi bezala, kadeteen partida izan zen jokatu zuten lehenengoa; A. Etxeberria eta Zelaiaranek ordezkatu zuten Oiartzun. Bihotzetik sufritzen dutenek ikusteko moduko partida ez zen izan, oiartzuarrek tanto bakarrarengatik galdu baitzuten.
Jubeniletan, O. Etxeberria eta Olaizek partida erraz irabazi zuten, gasteiztarrak tanto bakarrean utzi zituztelako. Nagusien mailakoa izan zen, beraz, kanporaketa alde batera edo bestera erabaki zuena. Zabaleta eta Landak osatutako bikoteak ezin izan zuen Arabako txapeldunekin, eta 22-19 galdu zuten.
Beraz, ez dira igandeko finalean izango. Gasteizek Markina-Xemeinen kontra jokatuko du hilaren 21ean, Zumarragan, 11:00etan hasita.
