Lanbarren industrialdeko Arañaburu errepidea konponduko dute
Uztailaren 29an hasiko dira lanak, eta hainbat aldaketa izango dira trafikoan, lanek iraun artean. Higadura handia du errepideak.
Arañaburu errepideko jaitsiera bi noranzkoetakoa bilakatuko da obrek iraun artean [Arg.: Google]. Lanbarren industriaguneak hiru eremu ditu: Elbarrena, Arkotz eta Arañaburu. Hirugarren horretako jarduera nagusia logistika eta garraio enpresak dira. Kamioi handien joan-etorri asko jasaten ditu, eta horrek errepidearen zoladura higatzen du. Oiartzungo Udalak gogorarazi duenez, zoladura eta kutxeten tapak berritu ditu azken urteetan, kamioien pisura egokitzeko.
Eraberritze lanekin jarraituko dute. Oraingoan, Arañaburu errepideko 1 eta 3 zenbakien arteko zatia txukunduko dute. Honako lanak egingo dituzte, udalak jakinarazi duenez:
- Egungo 15 zentimetroko zoladura kenduko dute, 35 cm hondeatu eta 10 cm-ko zahorrazko geruza eta gainean 25cm-ko hormigoizko zolata jartzeko.
- Kutxeta inguruak konpondu eta errepide zatia pintatuko dute.
136.000 euroko inbertsioa izango dute lanek, eta lau aste inguru luzatzea espero dute. Abuztuan izango dira lanak, tokiko enpresen jarduerak ahalik eta gutxien eragiteko.
Eragina trafikoan
Obrak uztailaren 29an hasiko dituzte, eta trafikoan eragina izango duela jakinarazi du udalak.
Horrela, bertako trafikoak norabide bakarra du, sarrerako biribilgunetik sartu, eraztun guztiari buelta eman eta berriro biribilgunetik irteera duena.
Obrak egiteko, industriaguneko sarrerako biribilgunean, egungo eraztuneko sarrera itxi egingo da, bi norabideetako trafikoa jaitsierako noranzkotik bideratuz. Gainera, hilaren 29tik aurrera Arañaburu 1etik 4ra bitarteko aparkalekuak kendu beharko dituzte, lanak bukatu arte.
