Oiartzungo Poesia Egunak jardunaldia, irailaren 13tik 15era
Lehen egun bateko jardunaldia zena, orain hiru eguneko egitasmo bihurtu dute. Bi deialdi luzatu dituzte oraingoz. Izena aurrez eman behar da.
2023ko Poesia Eguna. 1545 argitaletxeak, Metrokoadroka kolektiboak, Hitzen Lihoak, Oiartzungo Udalak eta Oiartzungo kulturzaleak laugarrenez antolatu dute Oiartzungo Poesia Egunak irailaren 13tik 15era. Gainera, aldaketa batekin dator ekimena; izan ere, orain arte Arte Egunak ekimenaren barruan antolatzen zuten Poesia Eguna, baina ekimen hori itxuraldatu eta hiru eguneko jardunaldi batetan bilakatu da Oiartzungo Poesia Egunak.
Oraingoz, bi deialdi luzatu dituzte:
- Loaldi Poetiko Herrikoa. Irailaren 13ko iluntzean izango da hori, eta Oier Guillanek Loaren defentsan poema sorta errezitatu ondoren, publikoari elkarrekin lo egitea proposatuko zaio. Errezitaldiaren ostean, ondorioz, gaubeila hasiko da, eta jendeak aukera izango du afaltzeko eta solasteko, besteak beste. Ordu erdiro Oiartzungo aktore batek loaren poema sortako ale bat hartuta pieza labur bat eskainiko du. Tarte honek goizeko ordu biak arte iraungo du, gehienez. Ondoren, loaldia hasiko da: jendeak lo egiten duen bitartean, argazkilari batek jendearen loa erretratatuko du, eta etorkizunean material horrekin pieza artistiko bat sortuko da.
- Bidegorriko ekitaldia. Irailaren 14an izango da ,11:00etan, eta Cadarsotik abiatuko da ibilbidea. eta hastapenetik ardatza izan den ekitaldia oraingoan ere bizirik mantendu nahi izan dute. Bidean zehar hiru errezitaldi egingo dira: lehenengoan herritarrek poemak irakurriko dituzte, bigarrenean herriko idazleek berariaz aurtengo gaiaren inguruan -‘Arrastoa’- idatzitako testuak irakurriko dituzte, eta hirugarrengoan aurten poesia liburuak plazaratu dituzten Euskal Herriko hainbat idazlek beren liburuetako aleak errezitatuko dituzte.
Bi ekitaldietako izena eman behar da helbide honetara idatzita.
Antolatzaileek argitu dute irailaren hasieran zabalduko dutela egitarau osoa, baina parte hartuko duten idazle eta artista batzuek zerrenda luzatu dute: Irati Jimenez, Oier Guillan, Titika Rekalt, Luix Mitxelena, Angel Erro, Mikel Etxaburu, Oihane Jaka, Maddi Sarasua, Aintzane Galardi, Gotzon Barandiaran, Rafa Rueda, Izar Azpiroz, Malen Elizasu, Ekhi Arizmendi, Miren Azkarate…
Antolatzaileek argitu dute irailaren hasieran zabalduko dutela egitarau osoa, baina parte hartuko duten idazle eta artista batzuek zerrenda luzatu dute: Irati Jimenez, Oier Guillan, Titika Rekalt, Luix Mitxelena, Angel Erro, Mikel Etxaburu, Oihane Jaka, Maddi Sarasua, Aintzane Galardi, Gotzon Barandiaran, Rafa Rueda, Izar Azpiroz, Malen Elizasu, Ekhi Arizmendi, Miren Azkarate…
