Jendea behar dute 'Ombuaren itzala' filmean agertzeko
Uztailaren 23an eta 24an grabatuko dituzte Pasaian hainbat eszena. Pedro Mari Otaño bertsolariaren bizitza da, oro har, filmaren ardatza.
Uztailaren 23an eta 24an ‘Ombuaren Itzala’ izeneko film bateko hainbat eszena grabatuko dituzte Pasai Donibanen eta Pasai San Pedron. Filmaren ildo nagusiak Pedro Mari Otaño bertsolariaren bizitza eta testuinguru historiko zein soziala dira. Ildo horretatik, Eguzkiart Zinema ekoiztetxeak boluntarioen laguntza eskatu du eszena horietan parte hartzeko.
Uztailaren 23an Pasai Donibaneko udaletxe zaharrean izango dira grabaketak, eta 15 figurante behar dituzte Otaño saritua izan zen garaiko osoko bilkura baten eszena bat grabatzeko. 18:30etik 21:30era izango da grabaketa, baina aldaketak egon daitezkeela ohartarazi dute.
Uztailaren 24an, berriz, Pasai San Pedroko Araunlari kalea izango da kokalekua, zehazki, Aita Manuelen etxearen parean. Horretarako 75 figurante boluntario behar dituzte herriak 1898an Otaño Pasaiako portutik Argentinara abiatu zenean egin zieten agur “hunkigarria” erreproduzitzeko. Bigarren egun horretan grabaketa 8:45etik 12:30era izango dira, gutxi gora behera.
1898. urtean girotua
Bi eszenak 1898. urtean daude girotuta eta beraz, interesa dutenei garai hartako jantziekin joateko eskatu zaie, hainbat gizarte egoeratako jendea irudikatzeko (baserritarren jantziak, alkandorak, garaiko gona eta galtzak, txapelak, alpargatak…).
Adin guztietako boluntarioak behar dituzte filma grabatzeko, eta figurante lanak egin nahi dituen orok baimen bat sinatu beharko du, aurrez. Parte hartzaileek ekoiztetxearen opari bat jasotzeaz gain, Patxi Bisquert Manterola zuzendariarekin hitz egiteko aukera izango dute.
Izena emateko 747 42 62 05 zenbakira deitu edo helbide honetara idatzi beharko dute bihar eta uztailaren 22an, 16:00-18:00 artean.
