Herri batekin egin du topo Eñaut Elorrietak
Madalen Aurreko Txistulari kontzertuko gonbidatu berezia izan da Elorrieta, eta zenbat eragile inplikatu diren eta plaza beteta ikusita, "hemen herri bat dago" adierazi du abeslariak. Madalen festek eztanda egiteko orduak falta dira.
“Hemen herri bat dago” adierazi du Eñaut Elorrieta abeslariak, Madalen Aurreko Txistulari kontzertuaren bukaeran, Zumardian. Hain zuzen, festa gosez dagoen herria da aurrean izan duena, eta ondoan, Udal Txistulari Taldea, Zaria korua, Xenpelar bertso eskola eta metal boskotea izan ditu. Aurrean, Zumardia goraino jendez beteta.
Urtero gisan, aurten ere egon da nor omendu, eta auzoetako emakume elkarteak izan dira goraipatuak. Konplize ditut eta abestia kantatu du Ilargi Arrizabalagak, eta taula partekatu du Ereintza Dantza taldeko dantzari nahiz auzo elkarteetako zenbait emakumerekin. Emanaldia izan bitartean, Eureka Dance taldeko dantzariak ere igo dira oholtzara.
Aitortza gehiago ere izan dira. Izan ere, Juan Ignacio Iztueta dantza maisuak Gipuzkoako dantza gogaingarriak liburua argitaratu zuela 200 urte bete dira aurten, eta bera ere omendu dute.
