Eztanda egin du festak

Mundu bat bildu da aurtengo omendua izan den DYA elkartearekin Madalen Jaiei hasiera emateko. Txupinak eztanda eginda, bost egun dituzte aurretik eta 130 ekitalditik gora herritarrek erruz gozatzeko.

Ikerne Zarate

Errenteria-Orereta

2024/07/21

Hasi dira madalenak. Mundu bat bildu da Herriko Plazara eta inguruetara aurtengo omendua izan den DYA elkartearekin Madalen Jaiei hasiera emateko. Konpromisoz eta inplikazioz bete dute udaletxeko balkoia DYAko boluntarioek, eta hunkituta piztu dute jaiei hasiera emateko txupina. Hori bai, aurretik bertsoa eskaini diote plazara bildutako herritar andanari, eta txaloka erantzun herritarrek. Txupina piztu bezala hasi da EMKEren musika banda Zentenarioa jotzen eta orduantxe bizi da, urtero legez, jaien hasierako unerik hunkigarriena: txunpa txunpa txunpa doinu ozenak, taupada bakarrean jarri du herria dantzan.

Urteroko beste klasiko batek ere ez du gaur hutsik egin. Ez du berorik egin, baina plazara bildutakoek eskertu egin dute balkoi batetik baino gehiagotik botatako ur baldekadak, baita mangera txorrota freskagarria ere.

Iaz bezala, ikurrin mordoa eta Nafarroako bandera ugari txupinazoan, baita Ernai Gazte antolakundearen Independentzia, sozialismoa, feminismoa zioen pankarta erraldoia plazaren erdi-erdian. Euskal errepresaliatuen etxeratzea eskatzen zuen pankarta ere presente gaurko txupinazoan, plazan. Jaia eta aldarrikapena uztartu daitezkeenaren erakusle.

Txupinazo garbia nahi zuen jai batzordeak, baita udalak ere, baina aurten ere ez da posible izan. Zikindutako askoz eta pertsona gutxiago ikusi dira han-hemenka txupina piztu zain, baina zikindu zikindu dira, nahiz eta ekiditeko bitartekoak jarri dituzten. Kristalezko botilak, irina, arrautzak, keptxupa, eta mostaza konfiskatzeko saiakerak ez du tamalez ekidin, bateren batek ihes egin eta plaza erdi-erdiraino heltzea.

Jai giroan murgildu dira herritarrak. Txupina piztuta, bost egun dituzte orain aurretik gozatzeko, eta 130 ekitalditik gora. Jai batzordeak eta udalak egindako deia gogorazi behar jaiak hasi berritan, “Errenteria-Orereta den bezain eredugarriak izan daitezela festak”.

Txupinazoaren argazkiak eta bideoa Liher Saizek eginak dira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.