Urte politikoko azkeneko plenoa, asteazkenean
Udalbiltza partzuergoa Oiartzungo Udalari adskribatzea izango da uztaileko ohiko plenoko bederatzi puntuetako bat.
Irailean izango da hurrengo plenoa. Ikasturte politikoa bukatzen da uztailaren azkeneko egunarekin batera. Oiartzungo udalbatzak plenoa egingo du datorren asteazkenean, hilak 24, jaieguna ez den hileko azkeneko asteazkena izango delako.
Pleno aretoan izango da, 18:00etan hasita. Gai-zerrenda ez da oso luzea izango, bederatzi puntu izango baititu. Nabarmentzekoa izango da Udalbiltza partzuergoa Oiartzungo Udalari adskribatzeko puntua, partzuergoak egoitza izan behar duelako.
Horrez gain, Haurtzaro Ikastolako jolas parkea eraberritzeko asmoa dute, eta horiek onura publiko lan gisa izendatzea aztertuko dute.
Gai-zerrenda
- Aurreko batzarrei dagozkien akten onarpena.
- Udalbiltza Partzuergoa Oiartzungo Udalari adskribatzea.
- Erregimen Bereziko Taxi Eremua sortzeko hitzarmena onartzea.
- Herri-bideen inbentarioko 195-196 Andrearriaga bidean egindako usurpazioa aldentzeko jabari publikoko ondasuna berreskuratzeko espedientean aurkeztutako alegazioa ebaztea.
- Haurtzaro ikastolako jolas parkea eraberritzeko lanak onura publikokoak izendatzea.
- Aurreko ekitaldietako ordainagiriak baliogabetzea eta dagokionean, kopuruak itzultzea eta ordezko ordainagiri zuzenak igortzea.
- 2024 ekitaldiko 5 zenbakiko Kreditu aldaketa onartzea.
- Beste organoen jardueraren jarraipena.
- Eskari-galderak.
