'Oiartzun' urtekaria eros daiteke, herriko 11 txokotan
Xanistebanekin batera etortzen den agerkaria salgai dago. 58 lagunek findu dute urtekariaren 54. zenbakia.
Urtekariko Batzordeko kideak: Ugaldebere, Cousillas, Eizmendi, Urdanpilleta eta Saez de Egiluz. Xanistebanak iragarleetako bat da Oiartzun urtekaria. 2024. urteari dagokiona dagoeneko salgai dagoela jakinarazi du Urtekari Batzordeak. Josune Cousillas, Joxan Eizmendi, Haizea Saez de Egilaz, Jaione Ugaldebere eta Garazi Urdanpilleta aritu dira koordinazio lanetan, eta beste 53 lagunen sinadura aurki ahal izango da aurtengo urtekarian.
Jakinarazi dutenez, “gogotsu” aritu dira aurtengo edukiak bilatzen, eta herriko talde, iniziatiba eta urteurrenak biltzen. Urtekariak 200 orrialde ditu, “mimo handiz” idatzitakoak. Bederatzi ataletan banatu dituzte 54. zenbakia: elkarrizketa, historia, seme-alabak, kultura, kirola, irakaskuntza, herriko eragileak, albiste aipagarriak eta argazki zaharrak.
Aurtengo elkarrizketa nagusia Miren Agiriano Ugartemendiari egin dio Izaskun Madariagak. “Emakume langilea, borrokalaria, eskuetan duena errazki banatzen duena, ama aparta eta batez ere, “txikien”, zanpatuen, ezinduen sufrimendua bere egiten duena”, azaldu dute. Oiartzunek duen kultur eta kirol bizitza oparoak isla du urtekarian.
Salmenta tokiak
Urtekariaren aurtengo zenbakia herriko 11 tokitan salduko dute. Honakoak izango dira, auzoen arabera alfabetikoki sailkatuta:
- Altzibar: Berezi janari-denda.
- Arragua: Pikoketa estankoa.
- Elizalde: Garmendi txokolategia, Garmendia okindegia, Urrats paper-denda eta Zapirain estankoa.
- Iturriotz: Ibarreko gasolindegia eta Martin harategia.
- Ugaldetxo: Intxixu jatetxea eta Mamuteko liburu-denda.
