Udalekuek aurreikuspenak gainditu dituztela dio udalak
Aurtengo udalekuetan 362 haurrek hartu dute parte, eta jardueraren amaiera aldean dauden honetan, balorazio positiboa egin du udalak.
362 haur bildu dira uda honetan Pasaiako Haur, Nerabe eta Gazteen Sustapen Sailak antolatutako udalekuetan, eta lau barrutietan ari dira hilabete osoan zehar hainbat jarduera egiten. Julen Rodriguez Aboy Gazteria zinegotziak azpimarratu du aurreikuspen guztiak gainditu dituztela, eta zerbitzuen balorazio oso positiboa egiten dutela.
Aurtengo honetan emozioak jarri dituzte erdigunean, eta ‘ni’ eta ‘gu’ kontzeptuen arteko elkarreragina ari dira lantzen besteak beste. Txikienek bidaiatzen dabilen inurri familia baten berri izaten dute astero, eta horiek bidean bizitzen dituzten gertakariak kontatzen dizkiete gaztetxoei. Jarduera horren bidez norbanakoaren ikuspuntua eta komunitate baten barruan bidaiatzeak zer dakarren ikasten ari dira. Bide batez, aipatzekoa da inurriak aukeratu dituztela “animalia txikiak direlako, baina baita langileak, kooperatiboak eta sozialak ere”.
Bada, ertainak eta handiak ere ari dira egokitu zaien gaiarekin lanean. Izan ere, argitaletxe batek hiri futurista bat irudikatu nahi du argitalpen baterako, eta, horretarako ideiak hatu nahian, herriko haurrei estralurtar propio bat diseinatzeko erronka luzatu zaie. Jarduera honen bidez haurrek irudimena, aniztasuna, gorputza, jarrera eta pentsaera lantzen dituzte.
Ertainek ipuinak dituzte oinarri, eta astean zehar kontatzen zaizkien ipuinei buruzko dinamikak egiten dituzte, harik eta azken egunean euren ipuina sortzen duten arte. Ekintza horiez gain, irteera eta txangoak ere ari dira egiten.
Bestalde, udalekuetako antolatzaileek azaldu dute aurtengoan ere hiru haur saharar ari direla udalekuetan parte hatzen, eta esperientzia polita ari dela izaten nabarmendu dute. Honela dio Rodriguezek: “Haur guztiak izugarri gozatzen ari dira aurtengo udalekuetan. Azken txanpan gaude, uztailaren 30ean amaituko baitira. Aurten eskaintza handitzeko egin dugun aparteko inbertsioaren ondoren, datorren urtekoa hobetzeko lanean ari gara dagoeneko, Pasaiako familien kontziliazio beharrei ahalik eta ondoen erantzuteko”, amaitu du Rodriguezek.
