Xantiren egun handia, festei agur esateko
Bukatzear dira madalenak bost egunen ondoren eta gaur ere Xanti eta Madalenek herriko kaleak zeharkatu dituzte, azkenekoz. Bestalde, Oreretako Asanblada Feministak elkarretaratzea deitu du 20:00etarako jaietan izandako hainbat eraso salatzeko.
Errenteria-Oreretako jaiek eztanda egin zutenetik, txinparta asko piztu dira herrian: Madalen Aurreko Txistulari Kontzertua; Kuadrillaren Eguna edota Madalen Eguna beste askoren artean. Gaurkoa azkena dute oreretarrek eta Santiago Egunaren aitzaki pean atera dira kalera oreretarrak.
“Goizean goiz esnatu direnei, egun on; eguerdian esnatu direnei, eguerdi on; eta gaupasaz daudenei, kaixo”, agurrarekin hasi dute Xenpelar Bertso Eskolak antolatutako bertso saioa. Foru plazan egin da urteroko hitzordu hau eta Irantzu Idoate eta Ekhi Mateo aritu dira bertsotan, Hazparnetik etorria lehena, eta Leitzatik bigarrena. Poliki-poliki, baina eserlekuak betetzen joan dira.
Bien bitartean, Lezoko, Beasaingo, Tafallako, Pasaiako, Irurtzungo eta Erriola konpartsetako erraldoiek herriko kaleak zeharkatu dituzte. Xanti eta Madalenek ere ez dute festa galdu nahi izan, eta buelta eta jira aritu dira herriko haurren zupakiekin. Musika jartzearen ardura, Gaztañoko Triki taldearena eta udal txistulari taldearena izan da. Joaldunek ere lurra esnatu dute soinua eginez. Maialen erraldoian eguna izan zen hilaren 22koa; gaurkoa Xantirena.
Eguna bukatu arte badago oraindik zer gozatu. Aldiz, gozatzearen aurkakoak dira erasoak eta hainbat gertatu direla madalenetan salatu du gaur Oreretako Asanblada Feministak. Horren aurrean erantzuteko deia egin dute gaurko (hilak 25, osteguna) 20:00etarako. Elkarretaratzera egingo dute Foru plazan (Xenpelar plazan).
Errenteria-Oreretako madalenak. Uztailaren 25eko egitaraua.
- 16:30-21:00 Madalenetako GT-LMP txapelketa. Reina aretoa. Antolatzailea: Hobby Cars Elkartea.
- 17:00 DANTZA JAIALDIA. Zumardia. Antolatzailea: Eureka Gazte taldea. Laguntzailea: Oliber Nestar Dantza eskola.
- 17:30 ERRALDOI ETA BURUHANDIEN KONPARTSEN IRTEERA. Ibilbidea: Koldo Mitxelena, Maria de Lezo, Madalena, Foru plaza, Biteri txiki, Herriko plaza. Antolatzailea: Erein Elkartea.
- 17:45 Kale antzerkia: “ADABAKI” Bapatean zirko. Koldo Mitxelena plaza (Euria egingo balu, Koldo Mitxelena patioa).
- 19:00 MUNDUKO ARROZAK. Panier-gunea. Antolatzailea: Oaingozhau kolektiboa.
- 19:00 Kontzertua: KALAKAN. Xabier Olaskoaga plaza.
- 19:00 XANTI ETA MAIALEN ERRALDOIEN AGURRA. Ondoren, UREZKO ZEZENA ENTZIERRO TXIKIA. Herriko Plaza.
- 19:00 Erretako txahalen XIX. DASTAKETA ERRALDOIA. Iztieta. Diputazio plaza. Antolatzailea: Euskaldarrak Elkartea.
- 21:00 Kontzertua: ILARGI. Panier-gunea. Antolatzailea: Oaingozhau kolektiboa.
- 22:30 Kontzertua: BANTZALDIA. ERRENTERIAKO MUSIKA KULTUR ELKARTEAREN BANDAREN EMANALDIA. Zumardia. Antolatzailea: Errenteriako Musika Kultur Elkartea.
- 00:00 ZEZENSUZKOA. Ondoren, Errenteriako Musika Kultur Elkartearen Bandak “El CENTENARIO” ohiko pasodoblea joko du, eta jaiak amaituko dira.
