"Kaleak, gauak, jaiak gureak dira"
Madalenetean izandako eraso sexistak salatu zituzten atzo. Ertzaintzak erasoen egileetako bat atxilotu zuen atzo goizean.
Argazkia: X / @AizpeaOM Madalenetan izan diren eraso matxistak salatzeko elkarretaratzea egin zuten atzo arratsaldean Foru plazan. Ehunka izan ziren Oreretako Asanblada Feministaren deialdiarekin bat egin zutenak. Kaleak, gauak, jaiak gureak dira lemadun pankartaren inguruan bildu ziren deialdiarekin bat egin zutenak. Asanbladako kideek azaldutakoaren arabera, hainbat izan dira festetan izan diren eraso sexistak, eta egileen kontrako salaketak ere jarriak daude.
Eusko Jaurlaritzako Segurtasun Sailak emandako datuen arabera, erasoetako bat atzoko (hilak 25, osteguna) goizeko 07:30ean izan zen. Nafarroa etorbideko autobus geltoki batean 24 urteko gizon batek bi emakumeri eraso egin zien, “ukituak egin zizkien” Segurtasun Sailaren arabera. Ertzainek erasoaren egilea identifikatu eta atxilotu egin zuten. Ertzain-Etxetik epailearen aurrera eraman zuten gizon hori.
Aizpea Otaegi alkateak biktima guztiei babes mezua helarazi die: “Ez bazaude eroso, erasoa da! Gure erabateko elkartasuna madalenetan eraso sexistak jasan dituzten emakumeekin”.
