Ikasketa agiri batzuk berreskuratzeko laguntza eskatu dute
Anastasiia izeneko errenteriar bati ikasteko beharrezkoak dituen agiri batzuk lapurtu dizkiote. Herritarrei dei egin die aurkitzen badituzte harekin kontaktuan jartzeko.
Anastasiia izeneko errenteriar bat herritarrei zuzendu zaie laguntza eske. Anastasiia ukrainarra da, eta hango gerrak eztanda egin zuenean Euskal Herrira etorri zen bizitzera. Ukrainarrak ikasketak jarraitu nahi ditu, eta eskatzen dizkioten agiriak bere jaioterrian zituenez, bertara joan zen ekainean haiek lortzeko.
Orain arte, Errenteria-Oreretan ikasi du, eta egindako lagunekin madalenetan izan da. Hilaren 20an (larunbata), baina, poltsa lapurtu zioten, eta ikasteko beharrezkoak dituen agiriak bertan zituen. Igande goizean salaketa jarri zuen, eta zenbait gauza berreskuratu ahal izan ditu; ez ordea agiriak. Hori dela eta, herritarrei zuzendu zaie: “Herritarren batek paperak aurkituko balitu, nirekin harremanetan jartzea eskatuko nuke”. Norbaitek haien berri izango balu, 691 50 25 75 telefono zenbakira deitzea eskatu du Anastasiiak.
