Jasangarritasun energetikorako hitzarmena berritu du Oarsoaldea Garapen Agentziak
Gipuzkoako Foru Aldundiarekin batera sinatutako hitzarmena da, eta eskualdeko lehen sektorearentzako plangintza bat egitea du asmo.
Oarsoaldea Garapen Agentziak eta Gipuzkoako Foru Aldundiak berritu egin dute energia jasangarritasunerako eskualde plangintza. Lehen sektorearen errealitate energetikoa ezagutzea du helburu, eta ekintzak bultzatzea ondoren.
Zehazki, Gipuzkoako nekazaritzako eta abeltzaintzako ustiategien egoera energetikoa da ikertuko dutena, eta iraunkortasunari eta lehen sektoreko pobrezia energetikoari buruzko datuak bilduko dituzte. Dokumentazio lana da egingo dutena.
Era horretan, lehen sektoreko profesionalei energiaren alorreko informazioa hobetzeko monografiko bat garatuko dute, eta aurreztean, eraginkortasunean, autohornikuntza energetikorako jardunbide egokietan, gomendioetan eta laguntza publikoetan oinarrituko da monografikoa.
Dagoeneko ikerketarekin lortuko dituzten emaitza batzuk aurreikusi dituzte, hala nola, berotegi efektuko gasen emisioak murriztea, baliabide naturalen erabilera optimizatzea, jarduera ekonomikoari eta enpleguari eustea edota zigorren ondoriozko etorkizuneko arriskuak murriztea.
Hitzarmen honekin, Oarsoaldea Garapen Agentziak lehen sektorean jasangarritasun eta efizientzia energetiko handiagoa lortzeko bidea markatzen ari dela azaldu dute, “eskualdearen garapen ekonomiko eta jasangarrian lagunduz”.
