Maitane Etxeberriaren amets olinpikoa bukatu da
Ezkerreko hankako iskiotibialean lehenengo graduko zuntz haustura egin du Etxeberriak eta etxera itzuliko da. Bi partida jokatu ditu Parisen, Brasilen eta Angolaren aurkakoak.
Argazkia: Bera Bera eskubaloi taldea. Brasilen eta Angolaren aurka jokatu ondoren, Maitane Etxeberria lezoarrak ez du gehiago jokatuko Parisko Olinpiar Jokoetan. Lehenengo graduko zuntz haustura izan du bere ezker hankako iskiotibialetan eta ezingo du gaur jokatu behar zuen Herbehereen aurkako partidan lehiatu.
Nazioarteko Federazioak deialdi ofizialetik jokalariak aldatzeko aukera ematen du, betiere medikuk baten txostenak hala eskatzen badu. Hartara, Etxeberriaren ordez, Alicia Fernandez arituko da.
Etxeberriaren Parisko ibilbidea errepasatuz, Brasilen aurka hilaren 25ean aritu zen lezoarra eta ia 21 minutuz jokatu zuen Bera Berako jokalariak. Angolaren kontra, berriz, hilaren 28an aritu zen eta 40 minutu baino gehiago aritu zen zelaian eta bi gol sartu zituen ere. Orain, sendatzeko garaia du Etxeberriak eta aurreikuspenen arabera hiru aste beharko ditu.
