Ibilbide gidatuetara joateak saria izan dezake
Lau ingurune ezagutzeko bisita gidatuak antolatu ditu Oarsoaldea Garapen Agentziak. Lau irteerak egiten dituenak, Oarsoaldeko museoak ezagutzeko bi bonu irabaz ditzake.
Natura gidarien zerbitzu ofiziala martxan jarriko du Oarsoaldea Garapen Agentziak abuztuko bigarren asteburuan. Era horretan, Errenteria-Oreretako ingurune naturala gida espezializatu batekin ezagutzeko aukera izango dute herritarrek. Guztira lau bisita dira antolatu dituztenak honako inguru naturaletara: Lau Haizeta Parketa eta Monumentu Megalitikoak; Aizpitarteko kobazuloak; Añarbeko baso erreserba; eta Aldura, Pertsele eta Igantzi mendietako bazterrak.
Gainera, aurten lau ibilbideak egiten dituenak sari bat jaso dezake. Izan ere, ibilbideetako bat egiten bada, zigilu bat eskuratzen da eta lau ibilbideen zigiluak lortzen dituenak, Oarsoaldeko Museoak doan bisitatzeko bi bonuren zozketan parte hartuko du.
Horrez gain, bisita gidatuak egutegitik kanpo egiteko aukera ere eskainiko du agentziak aurten. Taldeei begirakoa da eta aurretik kontsulta egin beharko da bisita erreserbatzeko. Erreserbak Errenteriako turismo bulegoan egin beharko dira, eta talde bakoitzeko, gutxienez, 10 lagun eta gehienez 15 onartuko dituzte.
Irteerak
Lau Haizeta Parkea eta Monumentu Megalitikoetara hiru irteera egingo dira, abuztuaren 11n, irailaren 7an eta urriaren 6an. Kasu guztietan 10:00etan irtengo dira San Marko gotorlekuko aparkalekutik eta hiru orduko txangoa egingo dute Txoritokietako estazio megalitikoan. Inguruko basoak eta hezeguneak ezagutzeko aukera ere egongo da.
Paleolitoko aztarnak ezagutu nahi dituenak abuztuaren 17a, irailaren 15a edota urriaren 12a gorde beharko du bere agendan. Listorreta Barrengoloiako informazio bulegotik irten, eta ordu erdiko ibilbidean zehar Euskal herrian aurkitu den Goi Paleolitoko lehen aztarnategia arakatuko dute. Bertan, antzinako ehiztariek egindako hartz, bisonte, otso, elur orein, orein, errinozero eta harrizko tresnen hondakin fosilak ikus daitezke.
Añarbeko baso erreserba ezagutzeko, lau orduko bidaia da egingo dute Idoiatik (Susperregi) abiatuta. Malbazargo eta Pagosardeko hezeguneetan bizi den faunaren berezitasunak ezagutuko dituzte, inguruko pagadietan barrena.
Azkenik, abuztuaren 31n, irailaren 29an eta urriaren 26an, Aldura, Pertsele eta Igantzi mendietako bazterretara egingo dute irteera. Igantzi mendietako bazterrak ezagutzera joango dira Idoiatik hasita. Hiru mendiak eta Añarbeko urtegiaren inguruko ikuspegi panoramieliak ikusteko aukera egongo da, lau orduko ibilbidean zehar. Aldurako elur zuloa, basoa lehengoratzeko prozesuak, anfibioak babesteko sortutako ur putzuak eta inguruko hegaztien biodibertsitateaz ikasteko parada ere izango da.
