San Pedroren eta Donibaneren arteko desafioa, bero-bero
Sanpedrotarrek irabazi dute aurtengo desafioa. Errebantxa datorren urteko San Pedroko jaietan izango dela adostu dute.
Gaur arratsaldean San Pedro eta Donibane barrutien arteko desafioa gauzatu dute Donibaneko Santiago plazan. Zortzi partaideko bi talde osatu dituzte arratsaldeko probak burutzeko. Plaza bero-bero zegoen, eta ez bakarrik arratsaldeko bero itogarriagatik. Gogotsu eta guztia emateko prest atera dira taldekideak.
Zazpiak hamargutxitan bota dute suziria, eta orduantxe hasi da bi txandetatik lehena. Igeriketarekin hasi dute desafioa. Talde bakoitzeko partaide batek bonantzatik plazaraino egin du igeri. Ondoren, kontrabandistei erreleboa eman eta bikoteka -lehenik mutilak eta ondoren neskak- buelta osoa eman diote plazari. Hirugarren proba ergometroa izan da eta taldekide bakoitzak 500 metroko sprint-a egin behar izan du. Segidan, txingen txanda izan da eta gero, lokotxena. Azken biak bikoteka egin dituzte ere. Azkenik, lehen txanda bukatzeko ergometroa egin dute berriz eta hala erabaki da irabazlea.
Bigarren txanda ingudeekin hasi dute eta bikoteka taldekide bakoitzak hamar altxaldi egin behar izan ditu. Erreleboa eman eta gero, gurpilaren proba egin dute. Joan etorria egin eta berriro ingudeen proba burutu dute. Txanda bukatzeko amaiera ikusgarria izan da: eszenatoki ondoko zutabea hiru aldiz igo behar izan dute.
Lehen txanda sanjuandarrentzat izan da. Alde handiarekin irabazi dute. Bigarren txanda, ordea, parekatuagoa izan da. Hasieran sanpedrotarrek aurrea hartu diete etxekoei, baina sanjuandarrek ez dute amorrik eman, eta oso gertutik jarraitu dituzte. Zutabea igotzen lehenak izan dira kamiseta moredunak, baina azken igoaldian arrosek harrapatu egin dituzte. Zutabearen goikaldera oso pareko heldu direnez, eta desafioak aurrera jarraitzeko nahia zegoenez herrian, sanpedrotarrei eman diete garaipena.
Berdinketa sokatiran hautsi dute. Lehen joaldian oso pareko hasi dira, baina azkenean sanpedrotarrek eutsi egin diote. Lehen puntua haientzat izan da. Bigarren joaldirako indarrak hartuta sanjuandarrek ezin izan diote bokalearen bestaldeko bizilagunei irabazi. Garaipena, beraz, moreena izan da gaurkoa. Hurrengo desafioa San Pedroko jaietan izatea adostu dute.
