"Jai arrakastatsuak" izan direla adierazi du Pasaiako Udalak
Barruti guztietako jaiak bukatu berri horien balorazioa egin du Pasaiako Udalak. Errespetuan oinarritutako jaiak izan direla nabarmendu dute.
Barruti guztietako jaiak bukatu berri horien balorazioa egin du Pasaiako Udalak. Udalaren helburua “norbanako guztientzako espazio seguruak” sortzea zen eta ahaleginak “fruituak” eman dituela nabarmendu du Teo Alberro alkateak. Gainera, herritarren parte hartzea handia izan dela eta barruti guztietan jai-giro paregabea sortu dela adierazi du.
Eraso matxisten aurka lanean
Pasaiako Udaleko Berdintasun sailak eraso matxisten aurkako protokolo berritzailea ezarri du aurtengo jaietarako. Protokolo hori herriko eragileekin elkarlanean diseinatu zuten eta barruti guztietako jaietan aktibo egon ondoren haren balorazio “baikorra” egin du Laura Ré Berdintasun zinegotziak.
Protokoloak eraso matxistei aurre egiteko beharrezko informazioa eta laguntzarako telefonoak eskaintzeaz gain, segurtasun arduradunen zein ekitaldietako antolatzaileen sentsibilizazioa eta prestakuntza izan ditu kontuan. Zinegotziak azaldu duenez, barruti bakoitzeko Jai Batzordeetan aurkeztu zuten protokoloa eta bilera espezifikoak egin zituzten hura lantzeko eta ekarpenak jasotzeko. Horrez gain, etxebizitza guztietan informazio txartelak banatu eta barruti bakoitzean pankartak ipini zituzten.
Datuak ere partekatu ditu udalak. Horiek adierazten dutenez, iazko urteko datuekin alderatuz, %60 murriztu dira Pasaiako Udaltzaingoak jaso dituen salaketa kopurua (jaiak hasi zirenetik bukatu diren arteko tartean, ekainaren 23tik uztailaren 31ra bitarte); eraso matxistak edo LGTBfoboak barne. 2023an 18 salaketa jaso ziren lau barrutietako jaien artean, 2024an 7 izan dira.
Ré zinegotziak nabarmendu duenez salaketetan “beherakada nabarmena” izan den arren, “horrek ez du esan nahi erasorik egon ez denik. Indarkeria matxistak ertz ugari ditu ea denak identifikatzea ez da nahiko genukeen bezain erraza. Emakumeok egunero egiten diegu aurre gure gorputz eta bizitzekiko bortizkeriei, eta indarkeria horiek desagerrarazteko lanak tinko jarraitu behar du”. Jaiak bukatu berri, jarraitu beharreko bidea argi dutela baieztatu du Rék eta datorren urteko jaiei begira lanketa sakonagoa egiteko konpromisoa berretsi du.
Errespetuzko jaiak eta askotarikoak
Jaiak iraun bitartean errotik desagerrarazi beharreko zenbait jarrera identifikatu badituzte ere, oro har, “elkarbizitzan eta errespetuan” oinarritutako jaiak izan direla adierazi du Teo Alberro alkateak. Horretarako, Jai Batzordea osatzen duten kideen lankidetza funtsezkoa izan dela aitortu du: “Jai Batzordea osatzen duten kideen lankidetza eta konpromisoa funtsezkoak izan dira aurten ere jaien segurtasuna eta garapen egokia bermatzeko. Zuen lan boluntarioari esker izan dira festa hauek arrakastatsuak eta biziz beterikoak”.
Parte hartzaile guztiei esker ona adierazi eta datorren urterako esperientzietatik ikasteko eta hobetzen jarraitzeko konpromisoa hartu dute.
