Iritsi dira Xanistebanak; lehertu da festa
Elkarteko 50. urteurrenean, Artaso elkarteko kideak izan dira festei hasiera eman dietenak. Arratsaldeko 19:30ean herritarren begiradapean bota dute txupina Goiatz Labandibar eta Enrike Lekuonak.
Urtero lez, abuztuan sartzearekin batera iritsi dira Xanistebanak. Doneztebe plaza txiki geratu zaie festaren hasiera ikustera gerturatu diren herritarrei. Uda giro betean jaiez gozatzeko irrikaz daudela argi utzi dute oiartzuarrek. Urtero egin ohi duten bezala udalbatza izan da arratsaldeko lehen protagonista. Haurtzaro Dantza Taldearen, Olarri Dantza Taldearen eta Larraun Txistulari Taldearen laguntzaz irten dira plazara eta irribarre eta urduritasun artean sokadantza dantzatu dute.
Momentu berezi horren ondoren, herriko etxearen balkoira begira jarri dira herritarrak. Bertan baitzeuden Artaso elkarteko hamarna lagun. Kamiseta gorri eta urdin koloreko zapiak soinean. Elkartearen 50. urteurrenean eurena izan da txupina botatzeko ohorea. Goiatz Labandibar eta Enrike Lekuonak elkarrekin bota dute arratsaldeko lehen suziria.
Lehenik eta behin, eskerrak eman dizkiote Jai Batzordeari aukera luzatzearren. Ondoren, oiartzuar orori Xanistebanez gozatzeko gonbita egin diete, eta nola ez, herriko festak bukatutakoan Karrikako festetara gerturatzeko deia egin dute: “Datorren astean hurbildu Karrikara festaz elkarrekin gozatzeko” esan du Lekuonak. Azkenik, “Gora Artaso! Gora Karrika! Gora Xanistebanak! Gora Oiartzun!” oihukatu dute, eta herriak, noski, gogotsu erantzun die.
Lehertu da festa; hasi dira Xanistebanak!
Behean gaurko zein biharko egitaraua atxikita.
XANISTEBANAK 2024
Gaueko egitaraua
- Gaueko 23:00etan: Musika Jaialdia, Txosnagunean. Antolatzaileak: Musika Batzordea.
- HERENEGUN
- ZILIBITO RECORDS
- HOFE X 4:40
- Gaueko 24:00etan: Musika Jaialdia, Done Eztebe plazan. Antolatzaileak: Musika Batzordea.
- ITZAL ERROMERI TALDEA
- Gaueko 24:00etan: DJ JOTATXO, Zimitiyoko Txosnan. Antolatzailea: Zimitiyoko txosna.
Bihar, Xanisteban Eguna
Oiartzungo jai eguna ospatzeko hurrengo ekintza eta ekitaldiak antolatu dituzte:
- Goizeko 07:00etan: SOKAMUTURRA, Beheko Plazan. Antolatzailea: Auzokalte Elkartea.
- Goizeko 07:00etan: GOSARI TXOW, Done Eztebe plazan. Antolatzailea: AIA.
- Goizeko 09:00etan: GOIZ ERESIA. Antolatzailea: Lartaun Txistulari Taldea.
- Goizeko 11:00etan: LARTAUN ABESBATZA kantuan eta BEGOÑA BERGARETXE harmoniumean Meza Nagusian Done Eztebe Parrokian.
- Ondoren: 47. KONTZERTU HERRIKOIA, Kontzejupean, Euskal doinu, kanta eta dantzetan oinarritutako emanaldia. Antolatzailea: Lartaun Txistulari Taldea.
- Goizeko 11:30ean: UR PUZGARRIAK, Landetxe plazan. Antolatzailea: AIA.
- Arratsaldeko 16:00etan: Madalensoro pilotalekuan, Oiartzungo Auzoen Arteko 36. SOKATIRA TXAPELKETA. Antolatzailea: Artaso Elkartea.
- Arratsaldeko 17:00etan: IPUIN KONTAKETA 3 urtetik gorako haurrentzat Ane Gebar-ren ahotsetik. Ondoren, askari osasungarria Arizmendienean (eguraldi txarra bada, Udaletxeko aretoan). Antolatzailea: Elizaldeko Guraso Elkartea.
- Arratsaldeko 19:30ean: DANTZA BILERA txistulariekin, Kastroko iturrian. Antolatzailea: Lartaun Txistulari Taldea.
- Arratsaldeko 20:00etan:Ekida Arte ekimen sozialistak antolatutako BERTSO SAIO MUSIKATUA txosnagunean. Antolatzailea: Ekida Arte ekimen sozialista.
- Gaueko 23:30ean: Musika Jaialdia, Done Eztebe plazan. Antolatzaileak: Musika Batzordea.
- ESANEZIN
- EIRE
- Gaueko 23:30ean: Musika Jaialdia, Txosnagunean. Antolatzaileak: Musika Batzordea.
- YAKOVLEV 42
- LA TXAMA
- Gaueko 24:00etan: DJ ELEPUNTO, Zimitiyoko Txosnan. Antolatzailea: Zimitiyoko txosna.
