1974an jaiotako antxotarrek kintoak ospatuko dituzte
Irailaren 28a izango da aurten mende erdia bete dutenen ospakizun handia. Deialdia irekia da, eta izena eman daiteke dagoeneko.
2022an Antxon ospatutako kintoen irudi bat da honakoa. San Fermin Txikitoko larunbata 1974an jaiotakoena izango da: kintoak ospatuko dituzte. Irailaren 28an egingo dute ospakizuna, eta 50 urte bete dituztela edo beteko dituztela izan da festa antolatzeko aitzakia.
Maiatzean hasi ziren festa egun hau antolatzen, mende erdia “merezi bezala” ospatu behar delako. Askotarikoa dela taldea azaldu dute, ikastetxe edo hezkuntza zentro ezberdinetan ikasi dutenak, alegia. Beraz, deialdia irekia da eta 1974an jaiotako edozein antxotar apunta daiteke egunarekin ederki asko gozatzera.
Izen emateko epea dagoeneko irekita dago eta honako lotura honetan egin beharko da, irailaren 6a baino lehen. Izena eman ondoren, 60 euroko ordainketa egin beharko da izen emate formularioan ageri den kontu korronte zenbakian.
Egitaraua
Irailaren 28ko eguneko egitaraua prest dute jada, eta parte hartzaileek ez dute goiz esnatu beharko. Lehen deialdia 11:30etarako jarri dute, San Fermin elizako eskaileretan talde argazkia ateratzeko. Ondoren, poteoarekin hasi, eta luntxa izango da Antxoko taberna batean. Horren ondoren poteoarekin jarraitu, eta bazkaria egingo da Zaharren Tokia erretiratuen elkartean.
Bazkaria eta gero, dantzarako unea izango da DJ batekin. Izena ematen duten guztiek oroigarri berezia eramango dute etxera: egunaren ikur izango den San Ferminetako zazpi gorri berezia. Baten batek informazio gehiago behar badu, hemen harremana egiteko hiru kontaktu: 687 850 306 (Ainhoa), 685 720 119 (Ana) eta 637 726 692 (Urko).
