Gaintxurizketako errepide "hilkorra" salatzera irtengo dira
Elkarretaratzea egingo dute bihar (hilak 6) Errekalde hotelaren parean. Beltzez jantzita joateko deia egin dute.
Iazko urte bukaeratik gaur arte, bost lagun hil dira Gaintxurizketan autoarekin lotutako istripuetan. Azkena, gaur izan da, GI-636 errepidearen 7. kilometroan 73 urteko emakume bat harrapatu du ibilgailu batek, eta bertan hil da biktima. Gidariak ihes egin du eta haren bila dabil Ertzaintza, gertatutakoa ikertzen ari den bitartean.
Gaintxurizketako segurtasun falta ez da albiste, eta elkarretaratzea egingo dute bihar (hilak 6) Gaintxurizketan dagoen Errekalde hotelean, 18:00etan. GI-636 errepidea “hilkorra” dela salatuko dute, eta beltzez jantzita joateko deia egin dute.
Urteak daramatzate bai herritarrak eta baita udala ere “soluzioak” eskatzen aldundiari, eremua seguruagoa izan dadin. Gainera, Don Bosco Formakuntza Zentroko ikasleek proposamen bat landu zuten ere, iazko urte hasieran beraien klase kide bat bertan izandako istripu batean hil ondoren.
Gaurkoan ere ez da isilik geratu Mikel Arruti Lezoko alkatea, eta hildakoaren senideei eta hurbilekoei doluminak emateaz gain, eta argi azaldu du istripua ez dela “zorigaitzaren kontua soilik” izan. Soluzioak galdegin ditu beste behin alkateak, eta horretarako erakunde bakoitzak dagokion lana egin behar duela dagokion arduratik azaldu du. “Urgentziazkoa da”, bukatu du.
