Olga Bienzobas, Errenteriako X. Tenis Openeko txapelduna
Bost aldiz txapeldun Inko Mujika izan zuen aurkari finalean Bienzobasek. Bi ordu eta erdiko lehiaren ondoren, txapela jantzi zuen. Bestalde, Iñigo Perez izan zen marka hoberena egin zuen errenteriarra.
Bukatu berri da Errenteriako X. Tenis Opena, Madalen Saria dena. Gipuzkoako Teniszaleen Elkarteak antolatzen du Errenteriako Udalarekin batera, eta aurtengo edizioak “oso harrera ona” izan duela azaldu dute. Herri eta hiri askotatik gerturatu dira tenislariak txapelketara: Donostia, Hondarribia, Tolosa, Bera, Legorreta eta Lasarte. Antolatzaileen arabera, afizionatu mailako tenisaren gune bihurtu da Madalen Saria probintzia mailan.
Txapelketa lau jokalariko sei taldetan, eta bost jokalariko beste batean antolatu dute. Lehenbiziko fasean, talde bereko jokalariek elkarren aurka jokatu zuten. Behin multzo bakoitzeko sailkapena eginda, bigarren fasean haien artean jokatu zuten. Kanporaketa zuzenak izan ziren eta lau kategoriatan bereizi ziren.
Aurtengo edizioan bi emakumek eman zutela izena lehen aldiz nabarmendu du antolakuntzak, nahiz eta horietako batek ezin izan zuen parte hartu. Beraz, parte hartu zuen jokalari emakume bakarra izan zen Olga Bienzobas, eta gainera, txapela jantzi zuen.
Bienzobasek bere multzoko hiru partidak irabazi zituen, eta lehen sailkatua izan zen ere lehen mailako final laurdenetan. Raul Ramosen kontra jokatu zuen– iazko txapelketako irabazlea– eta 6-4 eta 7-6 gainditu zuen Ramos Bienzobasek.
Finalerditan, Gaizka Aduriz izan zuen aurrean Bienzobasek. Aduriz bitan izan da txapeldun eta ikuskizun bikaina eskaini zuten biek ala biek. Aitzitik, Beraungo pilotalekuan inoiz jokatu den partidarik onenetarikoa izan zela diote antolatzaileek.
Adurizen eta Bienzobasen artekoa, 6-2, 6-7 eta 7-6 emaitzekin bukatu zen, Bienzobasen alde. Azken honek partidako 10 bola behar izan zituen Aduriz gainditzeko, eta bi ordu eta erdi baino gehiago iraun zituen norgehiagokak.
Finalera iritsi zen Bienzobas eta Legorretako Inko Mujika bost aldiz txapelduna izandakoa izan zuen parez parez. Finalean ere maila altua erakutsi zuten bi jokalariek, giro ezin hobean. Bienzobasek ez zuen lan erraza izan, eta garaipena lortu zuen 6-4 eta 7-5 emaitzekin.
Antolatzaileek Bienzobas zoriondu dute eta desio diote emakumeen zirkuitu profesionalera jauzi egiteko ametsa bete dezala. Azken lau urteetan Ameriketako Estatu Batuetan aritu da entrenatzen eta esperientzia horri esker igo duela maila azaldu du antolakuntzak.
Iñigo Perez, herriko tenislari onena
Errenteriako tenis jokalariei begira jarrita, Iñigo Perez izan da emaitza hoberenak lortu dituena. Pasa den urtean, laugarren mailako finala jokatu zuen, eta denboraldi honetan bere teniseko maila asko igo dela erakutsi ahal izan du. Izan ere, bere multzoan bigarren sailkatu zen, eta final laurdenetara sailkatzea lortu zuen.
Final laurdenetan, Felix Calvoren kontra aritu zen, eta garaipena lortu zuen errenteriarrak partida oso interesgarriaren ondoren: 6-4, 1-6 eta 4-6. Ondoren, finalerdietan Jon Iruretagoiena izan zuen aurrean, eta galdu egin zuen 6-3, 4-6 eta 6-2ko emaitzarekin. Errenteriarrekin jarraituz, laugarren sailkatuen arteko finala Ivan Vizcaino eta Sergio Delgadok jokatu zuten. Vizcaino izan zen irabazlea.
Hirugarren sailkatuen arteko finala Jon Fernandez eta Juan Lasa donostiarrek jokatu zuten, norgehiagoka “ikusgarria” eskainiz. Fernandez izan zen garaile honako emaitzekin: 6-3, 6-7 eta 6-4. Antzeko maila erakutsi zuten biek, baina Fernandezek asmatu zuen tanto erabakigarrietan.
Azkenik, Fernandezek eta Iruretagoienak bigarren sailkatuen arteko finala jokatu zuten, eta lehenak 6-3 eta 6-4ko emaitzarekin gailendu zuen Iruretagoiena.
