Aldarriz bete dute Gazteen Eguna
Biyurrienea Gazte elkarteak antolatu du Xanistebanetako Gazte Eguna. Aurten herriko bi presori eta Errigorari bideratuko diote bildutako diru guztia.
Biyurrienea Gazte elkarteko kideek “mimoz eta ilusio handiz” antolatu dute aurten ere Xanistebanetako Gazte Eguna. Kamiseta berde ilunak jantzi eta eguerdiko ordubata eta erdietan txosnagunean egin dute topo ondoren plazan elkarrekin bazkaldu duten 800 gazte inguruk.
“Herritik eta herriarentzako muxutruk” lan egin duten guztiei eskerrak eman eta jende berriarekin aurrekoek zabaldutako bideari eutsiko diotela azaldu dute elkarteko kideek: euskaratik eta euskaraz, feminismotik, zapalkuntza oro ikustarazten eta bertakoa eta jasangarria dena sustatuz.
Ondoren, aldarriz bete dute txosnagunea. Batetik, kartzelan dauden herrikideak, Joanes Larretxea eta Juan Mari Inziarte, izan dituzte gogoan. Gaurko eguna berengatik ere badela eta preso eta iheslariak etxean nahi dituztela esan dute ozen. Bestetik, Errigora dinamikarekin bat egin dutela azaldu dute. Herri ekimenaren 10. urteurrenean “Napar Erriberan re euskaraz bizitzeko aukera” izan dezatela aldarrikatu eta egun honetan bilduko duten diru guztia bi eragile horiei bideratuko dietela nabarmendu dute.
Aldi berean, beste hiru herrikide jasaten ari diren zapalkuntzez mintzatu dira: “Endika Loiola Yakovlev 42 taldeko kide da, ta Guardia Zibilak deituta hainbat letrengatik prozesu judizial batin dozte. Hortaz gain, Ernaiko zein Biyurriko din bi kidek re isun ekonomikua jaso dute elkartasun ekintza baten parte izatetik”. Hori dela eta, adierazpen askatasunaren alde haiekin izango direla adierazi dute gazteek.
Espazio segurua
Gazteen Eguna espazio seguru izan dadin lan handia egin dute Biyurrieneako kideek. Lehenik eta behin, inolako erasorik onartuko ez dutela esan dute irmo eta herrikideak feminismoaren konplize izatera animatu dituzte. “Indarkeria kasun bat ikusten bazu hurbidu eta babesa eman”, eta “zure laguna pasatzen ai bada ta ezer itten ez bazu, konplize za” gogoratu dute. Azkenik, protokoloa errepasatzeko baliatu dute aukera.
Bazkal aurreko poteoa txosnagunean egin ondoren, Doneztebe plazara igo dira eta bertan, paellaz eta profiterolez gozatu dute.
Hemen eguneko zenbait argazki:
- Goizeko 09:00etan: GOIZ ERESIA. Antolatzailea: Lartaun Txistulari Taldea.
- Goizeko 11:00etan: Oiartzungo ERRALDOI handien eta txikien kale-buelta Done Eztebe Plazatik abiatuta. Antolatzailea: Soinuenea Fundazioa.
- Goizeko 11:00etan: TOKA JOKOA Landetxeko atarian 18 urtetik gorako oiartzuarrentzat. Izen ematea egun berean, Gazte Izanak-en lokalean 11:00etatik 12:00ak arte. Antolatzailea: Gazte Izanak Elkartea.
- Eguerdiko 11:45ean: BERTSO JAIALDIA, txosnagunean. Alaia Martin, Nerea Ibartzabal, Andoni Egaña eta Amets Arzallus bertsolariekin; gai-jartzailea: Ander Lizarralde. Antolatzailea: Martzelina Bertsozale Elkartea.
- Eguerdiko 12:30ean: KANTU KANTARI. Kantuzale den orok herri-kantuen sorta ederra abesteko aukera izango du herriko kaleetan barrena. Denak gonbidatuta! Antolatzailea: Lartaun Abesbatza.
- Eguerdiko 13:00etan: GAZTE TXUPINAZOA, Txosnagunean. Antolatzaileak: Biyurrienea.
- Eguerdiko 13:30ean: GAZTEEN BAZKARIA, Done Eztebe plazan. Antolatzaileak: Biyurrienea.
- Arratsaldeko 16:00etan: Haur mailako banakako 24. XAKE LEHIAKETA, Madalensoron. Antolatzailea: Haurtzaro Ikastola.
- Arratsaldeko 17:00etan: TXOKO JOLASAK, Arizmendienean hasita. Antolatzailea: Haurtzaro Ikastola.
- Arratsaldeko 18:00etan: 32. ARIN-ARIN ETA FANDANGO TXAPELKETA, gaztetxoentzat Landetxe Kultur Aretoan. Gipuzkoa osoko dantzariak, 15 urtetik beherako neska-mutilak, Lartaun Txistulari Taldearen doinuekin dantzan. Antolatzailea: Aldeguna Elkartea.
- Arratsaldeko 18:00etan: Elektrotxarangak gidatutako POTEOA tabernaz taberna. Antolatzaileak: Biyurrienea.
- Arratsaldeko 19:30etan: DANTZA BILERA, Kastroko iturrian. Musikariak: Oiartzungo HM eskolako irakasleak. (eguraldi txarra bada, Kontsejupean). Antolatzailea: Soinuenea Fundazioa.
- Gaueko 22:00etan: Gazte eguneko jolasak Txosnagunean. Antolatzaileak: Biyurrienea.
- Gaueko 22:30etan: Dantzaldia, Done Eztebe Plazan, PATXI PEREZ. Antolatzaileak: Musika Batzordea.
- Gaueko 23:30ean: DJ FRESA MORANGO, Txosnagunean. Antolatzaileak: Musika Batzordea.
