Zortzigarren bandera lortu dute sanjuandarrek
Eusko Label ligan aritzen den Libia ontzia hamaikagarren izan da bi jardunaldietan. Euskotren ligan Hibaikak seigarren postuari eutsi dio. ETE ligan Batelerak bosgarren izan ziren larunbatean Oria ibaian eta KAE2 ligako Hibaikak ere postu bera lortu zuen Mundakan.
Argazkia: Iñaki Suarez. Orioko Oria ibaian jokatu ziren larunbatean KAE1 eta ETE ligak. Erlojupeko modalitatean bikain aritu ziren Donibaneko bi ontziak. Gizonezkoek zortzigarren garaipena eskuratu zuten, estropada oso sendo bat egin ondotik. Nagusitasunez irabazi zuten: 19:54,88an geratu zuten kronoa, hurrengo sailkatuak baino 29 segundo azkarrago. Lau estropadaren faltan KAE1 ligako jaun eta jabe dira arrosak.
Batelerak, berriz, azken jardunaldietako postua errepikatuz, bosgarren egin zuten. Estropada Astillerorentzat izan zen. Bigarren sailkatuari, Zumaiari, segundo bateko aldea atera zion Kantabriako ontziak. Hirugarren Kaiku eta laugarren Zarautz helmugaratu zen.
Hibaika play offa saihestetik gertuago
Hibaikako taldea Castroko estropadan uretara irten aurretik. Argazkia: Aitor Arrizabalaga.
Euskotren ligan play offa saihesteko lehia betean daude Hibaika eta Cabo. Asteburu honetara hiru puntuko errentarekin heldu ziren errenteriarrak, eta helburua argi zuten: bi egunetan Cabo atzean uztea. Asteburua, beraz, borobila izan da Madalen ontziarentzat. Bi egunetan seigarren egin dute, Caboren aurretik. Lau estropaden faltan bost puntura dituzte galiziarrak. Asteburu honetan Hondarribian eta Pasaian arituko dira.
San Pedroko Libiak, hamaikagarren egin du asteburuko bi jardunaldietan. Beste behin, ezin izan du play offeko postua ekidin. Une honetan 29 puntu ditu sailkapenea. Hamargarren sailkatua, Kaiku, hemeretzi puntutara du.
KAE2 ligan, berriz, Mundakan aritu ziren larunbatean eta Hibaikako gizonezkoak bosgarrenak izan ziren. Sailkapen orokorrean bosgarrenak dira ere, baina gertu dute laugarren postua, Busturialdeko trainerua puntu bakar batera baitute.
