Gaintxurizketako bizilagunak: "GI-636ak hiltzen gaitu"
Duela hamabost urtetik ari dira Gaintxurizketako bizilagunak beren segurtasuna bermatuko duen irtenbide seguru bat bila dezatela eskatzen. Atzo gertatutako istripuaren harira elkarretaratzea egin dute.
Atzo goizean (hilak 5) 73 urteko emakume bat hil zen Gaintxurizketatik pasatzen den Gi-636 errepideko 7. kilometroan, kamioi batek harrapatuta. Ezbehar honekin bost lagun dira iazko urte bukaeratik gaur arte eremu honetan autoarekin lotutako istripuetan hil direnak. Gaur arratsaldean Gaintxurizketako biztanleak Errekalde hotelaren parean elkarretaratzea egin eta egoera salatu dute.
Lehenik doluminak helarazi dizkiote atzo hildako emakumearen familia eta lagunei, eta ondoren, administrazio eta arduradunen utzikeriarekin “kokoteraino” daudela esan dute. Auzoan bizi direnak kotxea hartzera behartuta daude, inguruko errepideetan ez dagoelako oinezkoentzako azpiegiturarik: “Ez espaloi, zebrabide, ez semaforo… Baina GI-636 honetan arriskua areagotu egiten da” deitoratu dute.
Bizilagunek garraio publikora edo beste edonora heltzeko 3 errail gurutzatu behar dituzte, beren bizitzak arriskuan jarriz. Gainera, kotxe eta kamioi ugari pasatzen diren eremua da eta horiek, “abiadura handian” egiten dutela ohartarazi dute.
Honakoa ez da kalera irteten diren lehen aldia, ezta aldundiari neurriak hartzeko eskatzen dioten lehena ere. Hamabost urte daramate irtenbide seguru bat emateko eskatuz. Horregatik, “nahikoa da!” oihukatu eta amorruz egin dute galdera: “Gehiegi dira errepide honek eramandakoak, zenbat gehiago beharko dira arduradunek konponbidea jarri dezaten?”. Egoera horretan, beste behin ere, Gipuzkoako Foru Aldundiari eta dagokien arduradunei “benetako irtenbideak” jar ditzatela exijitu dute.
Pasarela baten proposamena
Joana de Almeida 2023ko urtarrilaren 6an zendu zen Gaintxurizketan auto batek harrapatuta. Don Bosco Lanbide Heziketa Institutuko ikaslea zen eta haren ikaskide eta irakasleek Gaintxurizketako errepidean hartu beharreko neurriak aztertu eta landutako proiektua Gipuzkoako Foru Aldundiari helarazi zioten. 2023ko martxoan izan zen hori.
Finean pasarela bat egiteko milioi bat euro eta erdi inguruko kostua zuen proposamena egin zuten. Orain artean, ordea, aldundiak ez du diru partidarik bideratu proiektu hori gauzatzeko. “Momentuko interesari bide emateko proiektuari bide emango ziotelaren plantak egin zituzten eta kaxoi batean geratu da” adierazi du gaur Joseba Ulazia bizilagunak.
Lezoko Udalarekin ere biltzen aritu dira bizilagunak. Duela bi hilabete egin zuten azken bilera. Bertan, Mikel Arruti alkateak bere momentuan Gipuzkoako Foru Aldundiarekin harremanak izan dituztela kontatu zien eta udaletik beste proposamen batzuk planteatu bazizkioten ere orain artean, ez dute ezer gauzatzerik lortu.
Iñigo Ugarte Gaintxurizketako bizilagunaren hitzak gaur arratsaldeko elkarretaratzean:
