Ibiltaria izango da bosgarren Kilometro Lezo jaialdia
Lezo Herri Eskolako patioaz gain, beste hiru agertoki nagusi izango dira aurten. Hilaren 23an abiatuko dute jaialdia.
Udaleko eta konpainietako ordezkariak, gaurko aurkezpenean. Kilometro Lezo jaialdiaren bosgarren edizioa berritasunez beterik dator. Datorren hilaren 23an (ostirala da)abiatuko dute, Trapu Zaharrak konpainiak emango dio hasiera aurtengoari. Hilaren 24an, 30ean, 31n eta irailaren 15ean izango dira ikuskizunak, lehen mailakoak guztiak. Lezoarrek bi antzerkiz, zirku ikuskizun batez eta bi dantza emanaldiz gozatuko dute.
Bosgarren edizioaren gaineko xehetasunak eman dituzte gaur udaleko eta parte hartuko duten konpainien ordezkariek. Trapu Zaharra, Orratx! Antzerki Taldea, Alas Cirsco Teatro, Harrobia eta Tio Teronen Semeak izango dira protagonista nagusiak, emanaldi bana eskainiko dute.
Aurreko edizioetan ez bezala, aurten jaialdia ibiltaria izango dela iragarri dute gaurko aurkezpenean. Hala, orain arte emanaldi guztiak Lezo Herri Eskolako patioan izan badira, aurten estreinakoz Lezotik barrena mugituko da. Herri Eskolako patioak emanaldi bat jasoko du, eta besteak Lopene plazan, Goiko plazan eta Santo Kristo Basilikaren paretan izango dira.
Jaialdia ibiltari bihurtzearen helburua “auzo bizitza sustatzea” dela nabarmendu dute gaurko agerraldian udal ordezkariek. Ohitura ez dauden espazioetara zabaldu nahi izan dute, “eskaintza kulturala herrian barrena zabaltzeko eta bide batez, publiko berriak erakartzeko”.
Berritasunen artean, Kilometro Lezo Open Kale Euskadiko Arteen Jaialdien Sarean sartu dela nabarmendu dute gaur. Sare horren barruan 15 jaialdi daude, eta horietako bat da Kilometro Lezo. Sare horren barruan ere Oarsoaldeko beste jaialdi bat dago: berriki izan den Pasaiako Dantza Festibala.
Programazioaren gaineko xehetasun gehiago lotura honetan kontsulta daitezke.
Egitaraua:
Abuztuak 23
- Antzerkia: ¡Dale Ramón!
- Konpainia: Trapu Zaharrak.
- Non: Lopene plazan.
- Ordua: 20:00etan.
Abuztuak 24
- Antzerkia: Ubu errege.
- Konpainia: Orratx! Antzerki Taldea.
- Non: Lezo Herri Eskolako patioan.
- Ordua: 22:00etan.
Abuztuak 30
- Zirkua: Aha! Circo.
- Konpainia: Alas Circo Teatro.
- Non: Lopene plazan.
- Ordua: 20:00etan.
Abuztuak 31
- Dantza: Geure(r)a, dantza bertikal ikuskizuna.
- Konpainia: Harrobia.
- Non: Santo Kristo Basilikaren paretan.
- Ordua: 23:00etan.
Irailak 15
- Dantza: Haurreskolari.
- Konpainia: Tio Teronen Semeak.
- Non: Goiko plazan.
- Ordua: 19:00etan.
