"Etorkizun bizigarriak marraztera" deitu dituzte errenteriarrak
2040ko udalerria irudikatzeko asmoa duen 'Etorkizuneko hiri eta herri desiragarriak: mapa bat utopiarako' izeneko ikastaroa abiatuko dute datorren irailaren 6an.
Agustinak eraikinean aurkeztuko du gobernu taldeak agintaldi Plana. Egun horretan zabalduko ditu ateak kultur eta sormen industrien poloak. Errenteriako Udalak eta Euskal Herriko Unibertsitateko Udako Ikastaroek elkarlanean antolatutako Etorkizuneko hiri eta herri desiragarriak: mapa bat utopiarako izeneko ikastaroa jasoko du Agustinak Zentroak datorren irailaren 6an (ostirala da). Udaleko iturriek jakinarazi dute parte hartzeko interesa dutenek oraindik aukera dutela, plaza libreak baitaude.
Ikastaroaren helburua “udalgintza komunitarioaren inguruan aurreko urteetan hasitako hausnarketari jarraipen praktikoa” ematea izango dela azaldu dute udaleko iturriek. Hiru ildo nagusi izango ditu ikastaroak: hiri eredua definitzeko osagaiak hautematea; herritarrei eta parte hartzaileei hausnarketarako espazio bat eskaintzea; eta eragile sozial eta ekonomikoen, herritarren eta udal eragileen arteko elkarlana sustatzeko bideei buruz hausnartzea.
Ikastaro hau, besteak beste, 2040ko udalerria “irudikatzeko” eta “etorkizun bizigarriak marrazteko” baliatu nahi dute eta horretarako etorkizun bizigarrietan, gobernantza ereduetan eta gizarte mugimenduetan interesa duten pertsonek izena ematea nahi dute. Bereziki, herriko eragileei zein biztanleei, udalgintza alorreko profesionalei, kargu publikoei eta gai hauekin zerikusia duten diziplinetako ikasleei zuzenduta dago.
“2040rako Errenterian edo beste herrietan lekutu daitezkeen utopiak irudikatuko dira, beste lurralde batzuetako esperientzien eta adituen ezagutzen eskutik. Gaurtik 2040ko gizarte eta herri desiragarria irudikatzeko izango dute erronka ikastaroan parte hartuko dutenek”, diote udaleko iturriek.
Ikastaroaren gaineko xehetasun gehiago eta izena emateko bideak, lotura honetan.
