'Julieta ETA Romeo' antzezlana izango da bihar eta etzi Landetxen
Iluntzeko zazpietan izango da ikuskizuna bi egunetan, eta sarrerak aurrez erosi behar dira. Ostiralerako ez da geratzen sarrerarik.
![](https://oarsoaldea.hitza.eus/site/files/2024/08/argazkitarako-00_07_53_29-imagen-fija003-1200x675.jpg)
Oiartzungo Gazte Sortzaileek antolatuta, Julieta ETA Romeo antzezlana egingo dute bihar eta etzi Landetxe Kultur aretoan, eta, argi utzi dute hau ez dela “ohiko” Romeo eta Julieta antzezlana, 1985. urtearen bueltan Euskal Herrian kokatzen den Julieta ETA Romeo egokitzapena baizik.
Luix Mitxelena oiartzuarra da testuaren sortzaile eta zuzendari nagusia, eta adierazi du ideologia “oso bestelakoak” dituzten bi familia direla protagonista: espainiar eskuineko familia bat eta ezker abertzaleko beste bat. Bi ideologia ezberdinetako kide izanik maitemintzean zer gertatzen den izango da hain justu lanaren ildoa. Mitxelena: “Maitasun hau ulertzen dugu? Gatazka alde batera utzi behar genuke eta egindako mina gainditu? Publikoa hausnarraraztea da helburua, betiere komediatik eta modu oso arinean, niretzat antzerkia ere badelako ondo pasatzeko eremu bat. Hausnartu egin behar da beti, baina ondo pasatzea oso garrantzitsua da”.
Larunbat zein igande iluntzeko zazpietan izango da ikuskizuna Landetxe kultur aretoan, eta sarrerak Oiartzungo Udalaren webgunearen bidez erosi behar dira -ostiraleko sarrerak agortuta daude, eta larunbaterako gutxi baino ez dira geratzen-. Sarrera bakoitzak zortzi euro balio du.