Poesia Eguna; eraldatuta eta hiru egunera luzatuta
Irailaren 13tik 15era izango da Oiartzungo Poesia Egunak jardunaldia, eta Poesia eguna irailaren 14an izango da.
Egun batekoa izan da azken hiru urteetan Poesia Eguna; baina dena bezala, eraldatuta hasiko du ikasturte berria honek ere. Izan ere, jardunaldi baten itxura hartu du egitasmoak, eta Oiartzungo Poesia Egunak izenpean bustiko dira literaturaz oiartzuarrak irailaren 13 eta 15 artean.
Ainara Lasa Perez oiartzuarra izateaz gain, Oiartzungo Poesia Egunak jardunaldiko antolatzaileetako bat ere bada, eta, noski, argi azaldu du eraberritze horren zergatia zein den: «Iruditzen zitzaigun Arte Egunaren fasea amaitutzat eman behar genuela besteak beste artisau eta artisten azoka bat ere antolatzen zelako. Talde eragilean, beraz, erabaki genuen Oiartzungo Poesia Egunak izenera jauzi egitea, nahiz eta jardunaldi horien barruan ulertzen dugun, poesia ardatz izanda, diziplinartekotasunak tokia duela».
Izena aldatu badiote ere, ordea, bere horretan mantenduko da Poesia Eguna, eta larunbatean, irailaren 14an, izango da aurten. Egun horretan Oiartzunen aski ezaguna den bidegorriko ekitaldia egingo dute. Altzibarren, Cadarson, abiatuko da ibilbidea, eta Karrikan amaituko dute aurtengo txangoa, ondoren bazkari herrikoia bertan egiteko. Aurreko edizioetan bezalaxe, aurtengo zitarako ere gai bat aukeratu dute antolatzaileek: Arrastoa. Lasaren arabera, antolatzen ari direnek kulturarekiko «kezka bat» partekatzen dute, gero eta arrasto txikiagoa uztearena, hain zuzen. «Ez ote diren sormen lanak berehala iraungitzen oihartzunik gabe, eztabaidarik gabe, aldekotasun edo kontrakotasunik gabe… Sortzen da, erakusten da eta kito, inolako arrastorik utzi gabe», zehaztu du.
Bidegorriko ibilbide horretan zehar, beraz, hiru errezitaldi egingo dituzte, eta lehenengoan herritarrek poemak irakurriko dituzte, baina dira edozein poema izango; dena delakoagatik haien bizitzetan arrastoa utzi dieten poemak izango dira horiek. Bigarren geldialdian Oiartzungo idazleena izango da ahotsa, eta arrastoa hitza ardatz hartuta eurek sortu dituzten poemak irakurriko dituzte.
Eta, azkenik, hirugarren geldialdian protagonista aurten libururen bat argitaratu duten poetak izango dira. Lehenengo edizioan Harkaitz Cano idazlea gonbidatu zuten, eta argitaratzear zituen sonetoak irakurri zituen hark. Orduz geroztik, urtero, lauzpabost poeta gonbidatzen dituzte.
Irailaren hasieran argitaratuko dute antolatzaileek egitarau osoa, baina Lasak aurreratu du ostiralean Irati Jimenez idazleak hitzaldi bat emango duela bere Begiak Zabalduko Zaizkizue liburua oinarri hartuta, eta larunbatean KantagiLtza egitasmoak antolatutako Erramun Martikorenaren elkarrizketa kantaldia egongo dela. Igandean, berriz, Gotzon Barandiaranen Galbahea lanean oinarritutako ikuskizuna eskainiko dute Landetxen.
Material artistikoa sortzeko, loaldia
Bada, ordea, bidegorriarekin batera luzatu duten beste deialdi bat: Loaldi poetiko kolektiboa, Lasak performance kolektibo gisa definitu duena. Oier Guillanek Loaren Defentsan izeneko poema sorta irakurriko du eta gogoeta egingo du «loa laguntzeko» beharraz. Irakurraldiaren ondoren, hartara animatzen den taldeak elkarrekin egingo du lo Landetxen, bertako oholtza gainean.
Gaua, bada, luze joango da. Gaueko une ezberdinetan Titika Rekalt, Lohizune Telletxea eta Luix Mitxelena aktoreek poema horietan oinarritutako antzezlan piezak eskainiko dizkie lotara animatu direnei. Gainera, publikoak elkarrekin lo egiten duen bitartean Ananda Berasarte argazkilariak loaldia erretratatuko du, eta material artistiko berria sortuko du irudiekin.
