Langile gazteak kontratatzeko Lanbideko laguntzak eskatzeko epea zabalik da
Eskaerak aurkezteko epea urriaren 31n bukatuko da. Kontratatutako pertsonek 30 urte baino gutxiago izan behar dituzte.
![](https://oarsoaldea.hitza.eus/site/files/2024/09/ayudas-lanbideweb_eusk-1.png)
Langile gazteak kontratatzeko Lanbideren laguntzak eskatzeko epea oraindik ere zabalik dela gogorarazi du Oarsoaldea Garapen agentziak. Errenteria-Orereta, Lezo, Oiartzun eta Pasaiako enpresek eskatu ditzakete laguntza horiek 30 urtetik beherako gazteak kontratatzerakoan.
Adina da laguntzak eskatzeko baldintzetako bat, eta horrekin batera, kontratatutako pertsona horiek langabezian izan behar dute eta Gazte Berme Sisteman izena emanda. Ikasketei dagokienean, gutxienez, Lanbide Heziketako Erdi Mailako gradu bat egina izan behar dute.
Eskatzeko epea, urriaren 31n bukatuko da.
Kontratazio laguntzen eskaera egin edo informazio gehiago nahi duten enpresek Oarsoaldea Garapen Agentziarekin harremanetan jar daitezke 943 51 02 00 telefono zenbakira deituta, astelehenetik ostiralera, 08:00etatik 14:30era, edo posta elektroniko bidez mezua bidalia —horretarako egin klik hemen—.
Oarsoaldea Garapen Agentziak kudeatzen duen programaren helburua, Lanbide-EEZn enplegu eskatzaile gisa izena emanda dauden gazte kualifikatuen kontratazioa sustatzea da. Iniziatiba “aukera bikaina” dela Oarsoaldea eskualdeko enpresentzat erantsi dute garapen agentziatik, “plantillak handitu eta gaztetzeko beharra badute eta, aldi berean, eskualdeko lau herrietan langabezia murrizten lagunduko lukete”.