Udala ere Hibaikazale
Hibaika Arraun Elkarteak herritar guztiak deitu ditu herriko arraunlariak animatzera eta horretarako, balkoi eta leihoetan arraun taldearen ikurra jartzera.
![](https://oarsoaldea.hitza.eus/site/files/2024/09/whatsapp-image-2024-09-04-at-15-02-41.jpeg)
Udaletxeko balkoi nagusian zintzilik da atzotik Hibaika Arraun Elkartearen bandera. Igandean Kontxako Banderaren bigarren estropada jokatuko da eta bertan ariko dira lehian Madalen ontziko emakumeak. Errenteria-Oreretako arraun klubak eskaera egin zion udalari bandera zintzilik jartzeko eta arraunlariei hitzordu garrantzitsuari begira babesa erakusteko.
Eskaera hori bere egin dute udalean ordezkaritza duten alderdi politiko guztiek eta aho batez onartuta atzotik da bandera udaletxeko balkoian. Horren bidez babesa erakustearekin batera, zorterik onena opa diote Madalen ontziko eskifaiari.
Errenteriako Udalari egindako eskaera, herritar guztiei zabaldu die Hibaika Arraun Elkarteak: “Herritar guztiak deitu nahi ditugu gure arraunlariei babesa erakustera eta horretarako, Hibaikaren bandera leiho eta balkoi guztietan jartzera animatu nahi ditugu”. Hibaikaren ikurrez lepo nahi dute herria, Hibaikaren arraunlariei bultzada emateko.
Horrekin batera, eta estropada eta haren bueltan sortzen den giroa zuzen-zuzenean bizi nahi dutenentzat ere egin du plana Hibaikak. Aurrekoan egin bezala, igande honetan ere, Marea Beltza Donostian izango da herriko arraunlariei hauspoa ematen. Bat egin nahi dutenek, 09:30ean azaldu behar dute Portaletasen.
Ondoko bideoa Hibaika Arraun Elkarteak sare sozialetan zabaldutakoa da, igandean Marea Beltzarekin bat egitera deitzeko.