Kenpo Kai Honbu elkarteak izen ematea zabaldu du
Elorsoro kiroldegian izango dira saioak, eta haurrek zein helduek izango dute parte hartzeko aukera. Edozein unetan probatu daiteke kirola.
Emma Garmendia, Mikel Osa eta Ibon Arrieta. Kenpo Kai Honbu elkarteak 2024-25 ikasturterako izen emate epea ireki du, eta aurreratu dutenez ikasturtean 5 ordutegi ezberdin eskainiko dituzte: haurren saioak astearte eta ostegunetan 17:00etatik 20:00etara izango dira (ordubeteko saioetan banatuta), eta helduen saioak astearte eta ostegunetan 19:45etik 21:00etara edo 10:00etatik 11:00etara.
Kenpo Kai Honbu elkartea Shihan Vidalen gidaritzapean dago, eta helduen saioak Shihan Vidalek eta Shihan Martinezek emango dituzte. Haurren saioen arduraduna, berriz, Shihan Alain Isasa oiartzuarra izango da, Mikel Artola senpaiaren laguntzarekin. “Kenpo Kaia arte martzial oso konpletoa da, borroka, autodefentsa, katak… lantzen dituena. Kenpo Kaiak pertsonaren garapen fisiko eta psikologikoa bilatzen du”, diote Kenpo Kai Honbukoek.
Edozein momentutan joan daiteke kirola probatzera, eta harremanetarako telefonoak helarazi dituzte horretarako: 608 934 420 eta 656 759 704. Mezu elektronikoa bidaltzeko aukera ere badute. Ikastaroa Elorsoro kiroldegian izango da.
Munduko txapelketa helburu
Elkarteko kideak lanean ari dira dagoeneko aurtengo “ekitaldi garrantzitsuena” prestatzeko: 2025eko Kenpo Kai-ko Munduko txapelketa. Japonian ospatuko da, Hamamatsu herrian. Gainera, txapelketaren egunean ekitaldi “historiko” bat biziko dutela diote; izan ere Shihan Vidal maisua I.K.K.O (International Kenpo Kai Organization) erakundeko lehendakari izendatuko dute. Orain arte Europa mailako zuzendaria izan da Vidal, eta lehen aldiz europar bat mundu mailako erakunde baten arduraduna izango da.
