Karmengo Ama haur eskolak "patio berdea" estreinatu du
Eskolako patioa berdetu eta naturalizatzeko lanak egin ditu Pasaiako Udalak, "leku atseginagoa eta estimulatzaileagoa" izan dadin.
Karmengo Ama haur eskolak patio berria estreinatu du. Maiatza-ekaina bitartean eskolako patioa berdetu eta naturalizatzeko lanak egin zituen Pasaiako Udalak, “leku atseginagoa eta estimulatzaileagoa” izan dadin. Beraz, ikasturte berri honetan jolaserako eremu “eraginkor eta atsegina” estreinatu dute haurrek.
Orotara, lanetarako 28.865,3 euroko inbertsioa egin dute. Udalak 18.289,3 euro jarri ditu eta Oarsoaldea Garapen Agentziak gainerakoa.
Lanei erreparatuz, honakoa egin dute: zuhaitz landaketak egin dituzte “loreontzietan itzalguneak eta babesleku klimatikoak sortzeko”; euri lorategi bat egin dute, “aldaketa klimarikoaren eraginez, gero eta maizago izango ditugun euriteen eragina apaltzeko”; berdegunea handi eta itxitura beri bat jarri dute, “haurrek bertara sarbidea izan dezaten”; CO2a xurgatzen duen belar artifiziala jarri dute; eta elementu naturalez egindako jolas eremu berriak sortu dituzte, altzari eta elementu berriekin.
