Loaldi poetikoan izena emateko aukera zabaldu dute
Poesia Egunen baitan antolatu dute hitzordua, eta gauean zehar 'Loaren defentsan' poesia errezitaldia eta 'Loaldi poetikoa' egingo dituzte.
Oiartzungo Poesia Egunen baitan eskainiko du Metrokoadroka Kolektiboak Loaren defentsan.
Hilaren 13an Landetxen egingo dute Loaren defentsan, eta 21:00etan hasiko da ekitaldia, Oier Guillanekin batera. Guillanek Loaren defentsan poesia errezitaldia egingo du, harrera eskubidearen eta beharren ideian inspiratuta.
Jarraian, Loaldi poetikoaren txanda izango da, 22:00etan. Tarte hori poemetan oinarritutako ekintza performatiboa izango da: gaualdiaren hasieran lau artistek (Ainhoa Alberdi, Luix Mitxelena, Titika Rekalt eta Lohitzune Telletxea) pieza labur bana eskainiko dute ordu erdiro.
Tarteetan publikoak lasai egoteko aukera izango du, eta nahi izanez gero besteekin partekatzeko proposamenak (musika tresna bat, esku lanak egiteko proposamen bat, kontakizun bat, poema bat…) ere ekar ditzaketela diote antolatzaileek.
Gero, gauean, Ananda Berasarte argazkilariak lotan dagoen jendea erretratatuko du.
Ekintza horietara joan nahi duenak mezu bat bidali beharko du, eta lo zakua eta afarian partekatzeko zerbait eraman beharko du. Gainera, azaldu dute publikoa ekitaldiaren zati bakarrera edo bietara joan daitekeela.
