20 emakumek erabili dute udalaren doako aholkularitza juridikoa
Martxoan jarri zuen martxan udalak emakumeak ahaldundu eta babesteko doako aholkularitza juridikoa. Udazkeneko txandak hartu daitezke.
Martxoan jarri zuen martxan udalak emakumeak ahaldundu eta babesteko doako aholkularitza juridikoa, eta zerbitzu berria “arrakastatsua” izan dela diote, hain zuzen, hilabete hauetan eskaini diren hitzordu guztiak bete baitira.
Zehazki, 20 emakumek erabili dute zerbitzua, eta gai eta esparru ezberdinak jorratu dituzte hitzorduetan: familia zuzenbidea, pentsioak, lan esparrua, indarkeria matxista edo atzerritartasun legea, kasu. Horretaz gain, udaletik azaldu dute zaintzaile bat kontratatu behar izanez gero zer eta nola egin behar den jakiteko edo zaintza lanetan aritzen direnek euren eskubideen inguruan galdetzeko bertara jo dezaketela.
Txanda berriak hartzeko aukera, zabalik
Prebentzio neurri bezala eta emakumeek erabakiak modu kontzientean hartzeko eskaintzen du udalak doako aholkularitza juridiko zerbitzua, aurrez informazioa eskaintzeko, aukera ezberdinak ezagutzeko, aztertzeko eta orientabidea zein babesa emateko. Zehaztu dutenez zerbitzu konfidentziala da, eta feminismo gaietan adituak diren abokatu profesionalek ematen dute. Hitzorduak aurrez aurrekoak dira, ordu betekoak, eta Altzibarko eskola zaharretako beheko solairuan (Agerrealde 7) izaten dira.
Udazkeneko txandei dagokienez, zabaldu dute izen ematea. Aurten astelehen arratsaldetan izango dira hitzorduak, hilean behin, 16:00etatik 19:00etara. Hauek dira datozen hilabeteetako hitzorduak:
- Hilak 19 (hitzordu bakarra geratzen da).
- Urriak 21.
- Azaroak 18.
- Abenduak 9.
Hitzordua telefonoz hartu behar da udalaren Gizarte Zerbitzuetako zenbakira deituta: 943 49 05 52.
