Lezoartasuna kalera ateratzeko egunak
Gaur egin dute ostiralean hasiko diren Santakrutz Jaien aurkezpen ofiziala. Ia 60 ekitaldi daude iragarrita, askatasunean eta seguru bizi beharrekoak denak.
Mireia Kuesta eta Jon Legorburu zinegotziak, eta Mikel Arruti alkatea (erdian), gaurko aurkezpenean. Ia 60 ekitaldi izango dituzte etzi (ostirala) hasiko diren Santakutz Jaiek. Jai Batzordeak mimoz prestatu ditu den-denak, Mikel Arruti alkateak antolakuntzan izan diren batzordekideek azaldu duten prestutasuna, konpromisoa, herrigintzarako gosea, lana, denbora eta esfortzua eskertu ditu; udaleko teknikari eta langileei ere aitortza egin die, haien lanagatik ere aurrera egingo dutelako festek. “Jaiak, dibertsioaz aparte, nolabait lezoartasuna azaleratzeko eta partekatzeko egunak izan daitezke. Gure izaera kolektiboa indartzeko egunak direla uste dugu. Horretarako ere baliatu behar dira jaiak: gure nortasuna, hizkuntza, kultura eta ohiturak sendotzeko lanabesa dira”, azaldu du agintariak. Lezoar izatearen harrotasun horretatik abiatuta, arduraz mintzatu da Arruti, herritar ororenak izan daitezela jaiak da ardura horren oinarria: “Lezoko plaza eta kaleek espazio seguruak izan behar dute. Guztiok gozatu behar dugu jaietaz. Herri seguru izate hori guztion ardura da. Jai egun hauek guztienak dira. Kalera atera, gozatu eta gure komunitatearen indarra azaleratu dezagun”. Ostiralean hasi, eta hilaren 16an (astelehena) bukatuko dira Oarsoaldeko azken jai handiak.
Jon Legorburu Kultura zinegotziak eman ditu egitarauaren gaineko zehaztapenak, “jaiek irauten duten denbora ia guztian beti zerbait egongo da”. Datei begira, berezitasun batean jarri du azpimarra: Santakrutz Eguna, I-14 Eguna, larunbatarekin ‘erori’ da. Horrek aldaketak ekarri dituela azaldu du Legorburuk. Adibidez, marmitako nahiz dantza txapelketak egitarautik atera behar izan direla jakinarazi du, larunbateko ekitaldi kopuru handi horregatik. Alta, Kilometro Lezoren barruko Harrobi Dantza Taldearen Geure(R)a ikuskizuna (larunbateko 22:45ean, Santo Kristo basilikaren paretan) nahiz Tio Teronen Semeak taldearen Haurreskolari dantza emankizuna (igandeko 20:00ean, Goiko Plazan) gehitu zaizkie santakrutzetan ohiko diren ekitaldiei. “I-14ko ekitaldiak nahiz bezperako danborradak mugitzen dute jende gehien beharbada. Baina adin eta gustu guztientzako ekitaldi sorta da landu duguna. Egitarau polita gelditu dela uste dugu. Ea eguraldiak laguntzen duen”.
Espazio seguruen gaineko gogoeta egin du festen aurkezpeneko gaurko agerraldiaren hasieran alkateak. Horretan sakondu du Mireia Kuesta Feminismo zinegotziak. Aipatu du jaiak definizioz garai pozgarri eta zoriontasunez beteak direla, ospakizun aroa. Baina izaera hori mantentzeko, jaiak askatasunez bizitzeko eta gozatzeko eskubidea lehen lerrora eraman du. “Onartezina da eraso matxistengatik emakumeek jaiak askatasunean gozatu ezin izatea. Festetan eroso eta seguru sentitzeko eskubidea dugu. Gure askatasuna mugatzen duten egoera horiek borrokatzea dagokigu”.
Borroka horretan, hainbat neurri adostu dituzte udalak eta herriko eragileek emakumeen kontrako erasoak balira. Hala, arretarako zerbitzu aktiboa abian izango da hilaren 13ko eta 14ko gauetan 00:00etatik 06:00etara; zerbitzu hori baliatzeko 688 69 62 04 telefono zenbakira deitu behar da. Gainera, hilaren 13an (ostiralean) indarkeria matxisten prebentziorako eta sentsibilizaziorako Puntu Morea jarriko dute Piku kalean, 18:00etatik 21:00etara. “Indarkeria sexista eta LGTBI+fobiari aurre egiteko informazioa eta tresnak eskaini, eta eraso matxistak saihesteko gunea da”, ohartarazi du Kuestak. Gainera, emakumeen kontrako indarkeria kasuren bat ematen bada, hainbat herritarrek formazioa jasoko dute, horren aurrean zer egin eta nola jokatu azaltzeko.
Jarraian, 2024ko Santakrutz Festen egitarau osoa, nahiz egunez egunekoa ikusteko aukera.
- Lezoko Santakrutz Jaiak 2024. Egitarau osoa (PDF artxiboa jaitsiko duzu hemen klik eginda).
- Lezoko Santakrutz Jaiak 2024. Egunez eguneko egitaraua.
