San Fermin Txikiak, kartel bila
Hilaren 27tik 29ra ospatuko diren jaiak iragartzeko 10-14 urte bitarteko haurrei begirako kartel lehiaketa antolatu dute.
Datorren hilaren 27tik 29ra San Fermin Txiki eta San Pedro Txiki Jaiak ospatuko dituzte. Antxotarrak horiei begira jarri dira jada, eta jaiak iragarriko dituen kartelaren bila hasi dira. Urteroko kartel lehiaketa egingo dute. Hilaren 16ra arte bidali daitezke lanak.
Pasaian jaio edota bizi den 10 eta 14 urte bitarteko edonork ahalko du parte hartu. Lanak DIN-A3 neurrian aurkeztu beharko dira eta edozein modalitate artistiko erabil daiteke. Honako mezua agertu beharko da irudian: «San Fermin txiki jaiak 2024-Pasai Antxo». Ez da egilearen sinadura edo bestelako zehaztasunik eman beharko. Kartelarekin batera, kartazal itxi bat aurkeztu beharko dute gaztetxoek, eta bertan egilearen izen-deiturak, helbidea eta telefonoa zehaztu beharko dira.
Kartel onenaren egileak 50 euroko kupoia jasoko du (Laurak Bat-en saltokietan gastatzeko), bigarrenak 30n eurokoa eta hirugarrenak 20koa. Saritutako lana Jai Batzordearen jabetzapean geldituko da.
Pasai Antxoko HAZ bulegoan (Hamarretxeta 24) aurkeztu beharko dira lanak.
