Musika elektronikoak girotuko du San Marko gotorlekua, etzi
'Dantz point' musika elektronikoaren jaialdia egingo dute larunbatean, eta egitaraua Furonia, Lila, Inhar Kone eta Lasa artistek osatuko dute.
San Marko gotorlekua. Larunbatean, hilak 14, Dantz point jaialdia ospatuko da San Marko gotorlekuan 17:00etatik 00:00etara, eta Furonia, Lila, Inhar Kone eta Lasa artistak izango dira egitaraua osatuko dutenak. Dantz point proiektua 2019an sortu zen, musika elektroniko eta garaikideko performance artistikoen eta sortzaileen bidez ondareari balioa emateko helburuarekin.
Jaialdiari hasiera Furonia donostiarrak emango dio, eta horren ostean Rebeca Azpiri Lila artistaren txanda izango da. Inhar Kone DJ donostiarrak jarraituko du ondoren, eta azkenik, Pasai Antxon bizi den Lasa DJ eta ekoizleak hartuko du erreleboa.
Antolatzaileek ohartarazi dutenez, foodtruck zerbitzua eskainiko dute Arretxe jatetxearen eskutik, eta aukera beganoa ere egongo da. Halaber, guneak barra zerbitzua izango du, eta jasangarritasuna bultzatze aldera edalontzi berrerabilgarriak erabiliko dituzte.
Egun osoan zehar debekatuta egongo da autoarekin gotorlekura igotzea, eta, beraz, beharrezkoa izango da autoak Masti-Loidi edo Egiburuberri poligonoan uztea. Ondorioz, antolakuntzak ezarri duen autobus zerbitzua erabili beharko da. Autobus zerbitzua 16:30etik 00:00ak arte izango da, eta hauek dira geltokiak:
- Egiburuberri biribilgunea. Autoak aparkatzeko aukera egongo da.
- Masti-Loidi poligonoa. Autoak aparkatzeko aukera egongo da.
- Jose Migel Barandiaran kalea (Pontika auzoa).
Turismo bulegoaren eskaintza, aldatuta
Jaialdia dela eta, turismo bulegoaren eskaintza aldatu egingo da, eta bisita gidatuak arratsaldean egingo dira, 17:00, 18:00 eta 19:00etan. Horietarako izena aldez aurretik edo momentuan bertan eman beharko da.
