Elizaldeko kaleak eta plazak ikuspegi feministatik garatzeko bidean
Horretarako, prozesu parte hartzailea jarri dute martxan. Lehenago, bi formakuntza saio egingo dituzte. Horiek hilaren 18 eta 23an dira.
Elizalde auzoa da Oiartzungo erdigunea. Izenak dioen bezala, eliza bertan dago. Elizaldeko kaleak eta plazak ikuspegi feministatik garatzeko prozesu parte hartzailea jarri dute martxan; hori garatzeko bi formakuntza saio egingo dituzte irailean, eta urrian egingo dituzte partaidetza bilerak.
Honela dio udalak argitaratu duen oharrak: “Hiriak eta herriak ikuspegi maskulino eta heteronormatibo batetik diseinatu izan dira, nahiz egunerokoan plazak eta kaleak emakumezkoek gehiago okupatzen dituzten komertzio txikira joanda edo zaintza zereginetan. Orain arteko hirigintza ereduak ez ditu emakumeen eta kolektibo zaurgarrien premiak erdigunean jarri izan”.
Hirigintzan eta hiri diseinuan hartzen diren erabakiek denei eragiten dietelako Oiartzungo gune nagusia den Elizalde hainbat ardatzen arabera aztertu eta proposamenak egiteko prozesua jarri du martxan udalak. Hain zuzen, Tolarieta eta hilerri arteko lurretan hurrengo urteetan garatuko den etxebizitza berrien antolaketa egiten hasi dira, eta udalaren arabera une ezin hobea da genero ikuspegia eta hiri inklusioa bultzatzeko baldintzak jarri eta Elizalde orokorrean hobetuko duen eredua sortzeko.
Prozesuak Oiartzunen bizitzen “arituak” diren emakume eta gizonekin egin nahi du bidea, herriko edozein auzotan bizi eta bertako kaleetan eta txokoetan orduak pasatzen dituzten herritarrekin. Horretarako, diagnosi eta ekarpen fasea egin aurretik, hirigintza feminista zer den lantzeko oinarrizko bi formakuntza saio antolatu dituzte. Saioak hilaren 18 eta 23an izango dira, 18:30ean, udaletxeko areto nagusian. Ongizate indibiduala eta kolektiboa, irisgarritasuna, mugikortasuna, zaintza, kontziliazioa eta erasoekiko segurtasuna hirigintzan nola txertatu izango dira aztertuko dituzten gaietako batzuk.
Prozesu horien ostean egingo dituzte parte hartze saioak, urrian. Saio horietan Oiartzungo eta bereziki Elizalde auzoko diagnostikoa egin eta proposamenak landuko dituzte.
