Jaizkibel eta Uliako altxorrak ezagutu eta zaintzeko sei hitzordu
Mater Ontzi Museo Ekoaktiboak Kostaldea Ikertzen proiektu parte hartzaileari ekingo diote beste urte batez. Sei hitzordu jarri dituzte datozen asteetarako, "natura ezagutu eta honekin bat egiteko" asmoz.
Iazko irteeretako baten irudia da hau. Mater Ontzi Museo Ekoaktiboak Kostaldea Ikertzen izeneko proiektu parte hartzailearen 22. edizioari ekingo dio. Programa honen barruan sei jarduera antolatu dituzte, “Jaizkibel eta Ulia mendietako senadietara herritarrak hurbildu eta itsasoak ematen dizkigun mirariak ezagutarazi eta haien kontserbaziorako jende gehiago maitemintzen saiatzeko” asmoz, museoko iturrien arabera.
Sei jarduera hauekin “natura ezagutu eta honekin bat egiteko” aukera eman nahi diete herritarrei. Mendi ibilbide baten bidez, bi mendietako senadi batera iritsiko dira taldean. Bertan, komunitatean eta herritar zientzia protokoloen bidez, uraren kalitatea neurtuko dute eta mareak ekarritako itsas hondakinak bilduko dituzte, besteak beste.
Sei hitzorduetan parte hartzeko ez da dirurik ordaindu beharko, baina aldez aurretik izena eman beharko da. Helbide honetara idatziz edo 619 81 42 25 telefono zenbakira deituta apunta daitezke interesdunak.
Honako datak proposatu dituzte: hilaren 22an Azabaratzan, hilaren 29an Alabortzan, urriaren 19an Murgitan, urriaren 20an Erentzin, azaroaren 3an Asturiagan eta azaroaren 17an Artzun.
