Martxotik motorako 134.436 bidaia ordaindu dira Mugirekin
Joan den martxoaren 6an integratu zuten Mugi motoran. Ordutik, bidaien erdia baino gehiago txartel horrekin ordaindu dira.
Joan den martxoaren 6tik Mugi txartel integratua erabili ahal izan da San Pedro eta Donibane (eta alderantziz) batzen dituen motoran. Sei hilabete bete dira sisteman txertatu zutenetik. Azahara Dominguez Gipuzkoako Garraioaren Lurralde Agintaritzak lehendakariorde eta Mugikortasuneko, Turismoko eta Lurralde Antolaketako diputatuak zerbitzuaren balantzea egin du.
Datuei erreparatuta, urte erdi honetan 134.436 bidaia ordaindu dira Mugi txartelarekin (abuztuaren 31ra arte hain zuzen). Orotara, 257.431 bidaia egin dira bi barrutien artean, eta %52,2, hau da, erdia baino gehiago, Mugirekin ordaindu dira.
Diputatuak gogorarazi du Mugi sisteman integratzea pasaitarren “aldarrikapen historikoa” izan dela : “Pasaiako motora erabiltzen duten Mugi txartelaren titularrek diru kopuru handia aurreztu ahal izan dute joan-etorrietan, 1,10 euro ordaintzetik 0,48 euro ordaintzera igaro baitira, urtarrilean onartutako % 50eko hobarien ondoren. Horrez gain, beste garraiobideetarako aldaketak doan egin ditzakete eta sei urtetik beherakoek ere doan bidaiatu dezakete. Gainera, txirrindulariek ez dute txartel gehigarririk ordaindu behar bizikleta motoran sartzeko, eta hori ere aurrezpen nabarmena izan da kolektibo horrentzat eta intermodalitatea sustatzen laguntzen du”, esan du.
